اقش-تا 22 جىل ءولىم جازاسىن كۇتكەن ايەل اقتالىپ شىقتى

استانا. 24 ناۋرىز. وسىدان 22 جىل بۇرىن ءوز بالاسىن ءولتىردى دەپ ايىپ تاعىلىپ, قاماۋعا الىنعان دەبرا ميلكە ەسىمدى اريزونا شتاتىنىڭ تۇرعىنى بوستاندىققا شىقتى. بۇل تۋرالى anspress.com حابارلادى. حابارلامادا كورسەتىلگەندەي, 1989 جىلدىڭ سوڭىندا الگى ايەلدىڭ بالاسىن ەكى ەر ادام –دجەيمس ستايەرس پەن رودجەر سكوتت ۇرلاپ اكەتىپ, فينيكس قالاسىنىڭ ماڭىندا ولتىرگەن. سودان, تەرگەۋ-تەكسەرۋ بارىسىندا ميلكە قاماۋعا الىنادى. ويتكەنى, قۇقىق قورعاۋ ورىندارى تاراپىنان وعان ءوز بالاسىن ولتىرۋگە تاپسىرىس بەردى دەگەن جالا جابىلعان. دالىرەگى, تەرگەۋشى ارماندو سالداتە ايىپتالۋشى بالاسىنىڭ اجىراسقان كۇيەۋىمەن قالۋىن جاراتپاعاندىقتان, وسىنداي ارەكەتكە بارعان دەگەن ۇيعارىمعا كەلگەن. سونداي-اق, سوت بالانى ولتىرگەن ەكەۋدىڭ بالا قازاسىنا ميلكەنىڭ ەش قاتىسى جوق ەكەنىن ايتقانىنا قۇلاق اسپاعان. بۇعان قوسىمشا, تەرگەۋشى الگى ايەلدەن جاۋاپ العان كەزدە زاڭسىزدىققا جول بەرگەن. ويتكەنى, تەرگەۋ امالدارى بارىسىندا جازىقسىز ايەل اۋرۋحانادا اۋىر حالدە توسەك تارتىپ جاتىپتى. قورىتا ايتقاندا, سوڭعى سوت ۇكىمى بويىنشا ميلكەنىڭ جازىقسىز ەكەنى دالەلدەنگەن. وسىلايشا, ءومىرىنىڭ 22 جىلعا جۋىق بولىگىن تۇرمەدە ءولىم ءساتىن كۇتىپ وتكىزگەن ايەل 51 جاسىندا اقتالىپ شىقتى. 20 جىلدان استام ۋاقىتىن اباقتىدا ءولىم جازاسىن كۇتۋمەن وتكىزگەن 51 جاستاعى ايەل بوستاندىققا شىقتى. ول تۇرمەدەن بوساتىلعان ساتتە: «ءوزىمدى جاقسى سەزىنىپ تۇرمىن» دەپتى. جولدىباي بازار. دەرەك, سۋرەت: anspress.com.