سۋرەت: fingramota.kz
Freedom Finance Global ارقىلى ەلىمىزدەگى بروكەرلىك بيزنەستى ۇسىناتىن Freedom ءBrokerدىڭ حابارلاۋىنشا, مەنشىككە الىنعان اكتسيالاردى تىركەگەن كەزدە بروكەرلىك شوت قاجەت بولادى. باعالى قاعازداردى ساتىپ الۋ مەن ساتۋعا تاپسىرىستاردى ورىنداعان جاعدايدا, اكتسيالار بويىنشا ديۆيدەندتەر العان كەزدە وسىنداي شوت كەرەك. «بيرجا نارىعىنداعى كەز كەلگەن ارەكەت تەك بروكەرلىك شوت ارقىلى جۇزەگە اسىرىلادى. كەلىپ تۇسكەن پايدالار مەن ديۆيدەندتەردىڭ ەسەبى تۇگەل شوتتاردا جۇرگىزىلەدى», دەيدى ساراپشىلار.
قازىرگى كەزدە وتاندىق باعالى قاعازدار نارىعى الدەقايدا قولجەتىمدى. جاستاردىڭ ينۆەستيتسياعا دەگەن قىزىعۋشىلىعى دا ارتىپ كەلەدى. ەلىمىزدە بروكەرلىك شوتتىڭ كوبەيۋى – سونىڭ ايقىن كورىنىسى. ولاردىڭ سانى 2023 جىلدىڭ باسىندا ميلليوننان از بولسا, بيىلعى كورسەتكىشتە بەس ەسەلەپ ارتقان. ورتالىق دەپوزيتاريدىڭ (KCSD) نومينالدى ۇستاۋ جۇيەسىندەگى بروكەرلىك شوتتاردىڭ جالپى سانى 2026 جىلدىڭ 1 قاڭتارىنداعى كورسەتكىش بويىنشا 5,06 ملن-عا جەتتى, ونىڭ 13,8 %-ى «قوجايىنداردىڭ» قوسالقى شوتتارىنا تيەسىلى بولسا, 86,2%-ى ومنيبۋس-شوتتار ارقىلى ەسەپكە الىنعان. ورتالىق دەپوزيتاريدىڭ دەرەگىنە سۇيەنسەك, كەيىنگى بەس جىلدا ەلىمىزدىڭ قور نارىعى كاسىبي ينۆەستورلاردىڭ شەكتەۋلى توبىنا ارنالعان قۇرالدان جەكە تۇلعالاردىڭ ءجيى پايدالاناتىن قارجى تەتىگىنە اينالعان. سونىڭ ىشىندە اسىرەسە, ومنيبۋس شوتتارى بەلسەندى كوبەيگەن. ومنيبۋس-شوت دەگەنىمىز – كليەنتتىك اكتيۆتەردىڭ جيىنتىق ەسەبىن جۇرگىزەتىن شوتتىڭ ارنايى ءتۇرى. «بۇل مودەل كليەنتتەرگە قىزمەت كورسەتۋدى كەڭەيتۋگە جول اشىپ, جەكە ينۆەستورلاردىڭ قور نارىعىنا تەزىرەك بەيىمدەلۋىنە مۇمكىندىك بەردى», دەيدى ماماندار.
بروكەرلىك شوتتار سانى جەدەل ءوسۋىنىڭ ەڭ سەرپىندى كەزەڭى 2023 جىل بولعان. ال 2024–2025 جىلدارى ءوسىم تۇراقتى سيپاتقا يە بولىپ, جىل سايىن نومينالدى ۇستاۋ جۇيەسىنە ميلليوننان استام جاڭا شوت قوسىلىپ وتىرعان. وتكەن جىلدىڭ قورىتىندىسى ءوسىم 40%-دان اسىپ تۇسكەن.
«بەس ميلليون بروكەرلىك شوتقا قول جەتكىزۋ – بۇل كەيىنگى جىلدارى نارىقتىڭ بارلىق قاتىسۋشىسى جۇرگىزگەن ۇلكەن جۇيەلى جۇمىستىڭ ناتيجەسى. بۇل وسىمگە بىرقاتار فاكتورلار اسەر ەتكەنىن اتاپ وتكەن ءجون. رەتتەۋشى بازانى جەتىلدىرۋ, باعالى قاعازدار نارىعىنىڭ تسيفرلىق ينفراقۇرىلىمىن جۇيەلەۋ, بروكەرلەر مەن بانكتەردىڭ ءموبيلدى قوسىمشالارىن دامىتۋ, سونداي-اق پاندەميا كەزەڭىندە باستالعان حالىقتىڭ قارجىلىق باعىتىنداعى وزگەرىستەر وسى سالانىڭ بەلسەندىلىگىن دامىتۋعا ىقپال ەتتى», دەيدى ورتالىق دەپوزيتاريدىڭ باسقارما توراعاسى ەدىل مەدەۋ.
ونىڭ ايتۋىنشا, ينۆەستيتسيالىق ساۋاتتىلىقتىڭ ارتۋى دا بروكەرلىك شوتتىڭ كوبەيۋىنە اكەلگەن. قور نارىعى جيناقتاۋدىڭ باسقا ءداستۇرلى تۇرلەرىمەن سالىستىرعاندا اناعۇرلىم تاۋەكەلى جوعارى. سوعان قاراماستان حالىقتىڭ باسىم كوپشىلىگى قور نارىعىن ينۆەستيتسيالاۋ مەن جيناقتاۋدىڭ قۇرالى رەتىندە سانالى تۇردە قاراستىرادى», دەدى باسقارما توراعاسى.
