بوكس. رومان جايلاۋوۆتىڭ قارسىلاسى انىقتالدى

استانا. 24 ناۋرىز. قازاقستاندىق 20 جاسار كاسىپقوي بوكسشى رومان جايلاۋوۆتىڭ كەلەسى قارسىلاسى انىقتالدى. ول 13 ءساۋىر كۇنى وڭتۇستىك افريكا رەسپۋبليكاسىنىڭ يوحاننەسبۋرگ قالاسىنداعى Emperors Palace ارەناسىندا جەرگىلىكتى بوكسشى لۋياندا دجاكومەن قولعاپ تۇيىستىرەدى. بۇل تۋرالى BoxingNews.kz حابارلادى. رەيتينگىلىك ستاتۋسى بار بۇل شايقاس 6 راۋندتان تۇرادى. ال بوكس كەشىنىڭ باستى شايقاسى وار-دىڭ ءبىرىنشى ورتا سالماقتاعى چەمپيوندىعىنىڭ بەلبەۋى ءۇشىن جەرگىلىكتى سپورتشىلار گرانت فيۋري مەن ۋوررەن يۋبەرتتىڭ اراسىندا وتەدى. كەمپتون پاركتە وتكەلى تۇرعان ۇرىستىڭ ۇيىمداستىرۋشىسى رەتىندە گەننادي گولوۆكين مەن مارتين ميۋررەيدىڭ جەكپە-جەگىن جارىققا شىعارعان Golden Gloves پروموۋتەرلىك كومپانياسى كورىنبەكشى. اتالمىش كومپانيانىڭ باسشىسى, وڭتۇستىكافريكالىق بەلگىلى پروموۋتەر رودني بەرمان ازىرگە جەڭىلىستىڭ اششى ءدامىن تاتىپ كورمەگەن قازاقستاندىق كاسىپقوي بوكسشى رومان جايلاۋوۆ جونىندە جاقسى پىكىر ءبىلدىردى. Golden Gloves پروموۋتەرلىك كومپانياسىنىڭ باسشىسى World Boxing News.net باسىلىمىنا بەرگەن سۇحباتىندا جايلاۋوۆتىڭ جاڭا گەننادي گولوۆكين بولۋعا تولىق مۇمكىندىگى بار ەكەنىن اتاپ ءوتتى. بەرماننىڭ ايتۋىنشا, جايلاۋوۆتىڭ ءستيلى جاس كەزىندەگى گولوۆكيندى ەسكە تۇسىرەدى. «مەن بۇل جىگىت تۋرالى تالاي نارسەنى ەستىپ كەلەمىن. بىراق ءوزىڭ ونى ءىستىڭ ۇستىندە كوزىڭمەن كورگەنگە دەيىن بىردەڭەنى اشىپ ايتۋىڭ قيىن عوي. ءبىز قازىر جاڭا گولوۆكين بولاتىن ادامدى ىزدەپ ءجۇرمىز. ەگەر رومان تىم بولماعاندا, گولوۆكيننىڭ جارتى دەڭگەيىنە جەتە السا, ودان ديناميت شىعار ەدى. الداعى ۋاقىتتا ونىڭ ءوزىن قالاي تانىتاتىنىن كورەرمىز», - دەدى بەلگىلى پروموۋتەر. جاسى قازىر 20-داعى رومان جايلاۋوۆ شىمكەنتتە تۋعان, استانادا تۇرادى. كاسىپقويلار رينگىندەگى تۇساۋى 2012 جىلى 18 جاسىندا كەسىلدى. قازىر ونىڭ ەسەبىندە 13 شايقاستان 13 جەڭىس بار. بوكسشى بۇلاردىڭ 8-ءىن مەرزىمىنەن بۇرىن اياقتادى. جايلاۋوۆ – ازيا WBC (Asian Boxing Council) بوكس كەڭەسى مەن پانازيالىق بوكس اسسوتسياتسياسى (PABA) ۆەرسياسىنىڭ جارتىلاي ورتا سالماقتاعى (63,5 كگ-عا دەيىن) چەمپيونى. ايتا كەتۋ كەرەك, روماننىڭ قارسىلاسى لۋياندا دجاكو ءوزىنىڭ بۇعان دەيىنگى بارلىق 9 شايقاسىن ءبىرىنشى جارتىلاي ورتا سالماقتا وتكىزىپ كەلدى. دامير قوجامقۇل.