سۋرەتتى تۇسىرگەن – ۆالەري بۋگاەۆ
وبلىس ورتالىعىندا №47 ورتا مەكتەپتىڭ اشىلۋى – شاھار ءۇشىن ماڭىزدى وقيعا, ءوڭىردىڭ ءبىلىم بەرۋ ينفراقۇرىلىمىن دامىتۋ جولىنداعى ەلەۋلى قادام. «كەلەشەك مەكتەپتەرى» ۇلتتىق جوباسىن ىسكە اسىرۋ اياسىندا وسىمەن وبلىس ورتالىعىندا ەكىنشى زاماناۋي مەكتەپ بوي كوتەرىپ وتىر. ۇلتتىق جوبا بالالاردىڭ زەرتتەۋشىلىك داعدىلارى مەن شىعارماشىلىق ويلاۋ قابىلەتىن دامىتاتىن جاڭا بۋىنداعى ءبىلىم بەرۋ كەڭىستىگىن قالىپتاستىرۋعا باعىتتالعانى ءمالىم. ال جاڭا عيمارات ەكىنشى جاعىنان شاھاردا قازاق تىلىندە ءبىلىم الاتىن وقۋشى ورىندارىنىڭ تاپشىلىعىن ايتارلىقتاي جويدى. اتالعان ءبىلىم ۇياسىنىڭ قۇرىلىسى 2024 جىلدىڭ جەلتوقسانىندا باستالعان ەدى. جوبانىڭ تاپسىرىس بەرۋشىسى – «Samruk-Kazyna Construction» اق. قۇرىلىسىنا 3,8 ملرد تەڭگە جۇمسالدى.
مەملەكەتتىك تىلدە ءبىلىم بەرەتىن مەكتەپ زاماناۋي وقۋ كابينەتتەرىمەن, مامانداندىرىلعان زەرتحانالارمەن, كەڭ سپورت زالدارىمەن, كىتاپحانامەن, وقۋشىلاردىڭ ساباقتان تىس ءىس-شارالارىنا, دەمالىسىنا ارنالعان ايماقتارمەن جابدىقتالعان. جوبالاۋ بارىسىندا قاۋىپسىزدىك, قولجەتىمدىلىك جانە ءبىلىم بەرۋ ۇدەرىسىن تسيفرلاندىرۋ ماسەلەلەرىنە ەرەكشە كوڭىل بولىنگەنى بايقالادى. وقۋ كەڭىستىگى يننوۆاتسيالىق وقىتۋ ادىستەمەلەرىن ەنگىزۋگە, وقۋشىلاردىڭ شىعارماشىلىق جانە زياتكەرلىك الەۋەتىن دامىتۋعا بەيىمدەلگەن.
– مەملەكەت باسشىسى قاسىم-جومارت توقاەۆتىڭ «كەلەشەك مەكتەپتەرى» باستاماسى اياسىندا وڭىرىمىزدەگى ءبىلىم بەرۋ سالاسىن دامىتۋ بويىنشا جۇيەلى جۇمىستار جۇرگىزىلۋدە. وبلىسىمىزدا ءۇش اۋىسىمدىق وقۋ ماسەلەسىن شەشۋ ماقساتىندا جاڭا ءبىلىم وردالارى مەن مەكتەپتەرگە قوسىمشا عيمارات سالۋ جۇمىستارى جالعاسىپ جاتىر. بۇعان دەيىن دوستىق شاعىن اۋدانىندا 1200 ورىندىق مەكتەپ اشىلعان ەدى. كەيىنگى ءۇش جىلدا وبلىستا جاڭادان 10 مەكتەپ تۇرعىزىلدى, سونىڭ ناتيجەسىندە ءۇش مىڭعا جۋىق بالا ساپالى ءارى زاماناۋي ءبىلىم الۋدا, – دەيدى ءوڭىر باسشىسى اسايىن بايحانوۆ.
اكىمنىڭ سوزىنشە, الداعى جىلدارى وبلىس ورتالىعىندا ءۇشىنشى مەكتەپتىڭ قۇرىلىسى كوزدەلىپ وتىر. 1200 وقۋشىعا لايىقتالعان عيمارات ۋسولكا شاعىن اۋدانىندا سالىنادى. قۇرىلىسى بيىل باستالىپ, كەلەسى جىلى اياقتالۋى كەرەك. قازىرگى كۇنى جوبالىق-سمەتالىق قۇجاتتاماسى دايىن.
جاڭا ءبىلىم ۇياسىنىڭ ديرەكتورى ءلايلا ءجۇسىپوۆانىڭ اقپارىنشا, مەكتەپ 600 ورىنعا شاقتالىپ سالىنعانىمەن, قازىردىڭ وزىندە مۇندا 805 وقۋشى پارتاعا وتىرىپ ۇلگەرگەن. وقۋشىلاردىڭ كەلۋى ءالى دە جالعاسىپ جاتىر. سوعان وراي باستاۋىش سىنىپ وقۋشىلارى ەكى اۋىسىممەن وقيدى.
– مەكتەبىمىزدىڭ ماتەريالدىق-تەحنيكالىق بازاسى وتە كەرەمەت, بارلىعى جاقسى جابدىقتالعان. ءپان مۇعالىمدەرىمەن تولىق قامتىلعان, جوعارى بىلىكتى 74 ۇستاز ساباق بەرەدى. كامال ماقپالەەۆ اتىنداعى №4 مەكتەپ پەن ءاليحان بوكەيحان مەكتەبىنەن 4 سىنىپ كەلسە, وزگەلەرىنەن 12 سىنىپتاي كەلدى, – دەپ اتاپ ءوتتى ءبىلىم ۇيىمىنىڭ باسشىسى.
جالپى, كەيىنگى جىلدارى وبلىستا قازاق سىنىبىن تاڭداعان وقۋشىلار ۇلەسى تۇراقتى ءوسىپ كەلەدى. بيىلعى وقۋ جىلىندا ءوڭىر بويىنشا 11 مىڭعا جۋىق بالا مەكتەپ تابالدىرىعىن العاش اتتاسا, ولاردىڭ 52,2 پايىزى قازاق سىنىبىنا بارعان. ەگەر 2020 جىلى بۇل كورسەتكىش 35,5 پايىز بولسا, 2023 جىلى – 43 پايىز, 2024 جىلى 45 پايىز بولعان ەدى. 2025 جىلى بىردەن 7,2 پايىزعا ارتقان.
تاعى ءبىر جاعىمدى ءۇردىس, جاڭادان اشىلىپ جاتقان قازاق مەكتەپتەرىنە وقۋشى ىزدەپ تابۋ بۇرىنعىداي كۇردەلى ەمەس. ماسەلەن, پاۆلودارداعى «سارىارقا» شاعىن اۋدانىندا 2022 جىلى مەملەكەتتىك تىلدە وقىتاتىن ءاليحان بوكەيحان اتىنداعى مەكتەپ-ليتسەيى اشىلعان ەدى. ءبىلىم ورداسى العاش تازا قازاق تىلىندە بولادى دەگەندە شاھارداعى ءورىستىلدى قاۋىم شۋ ەتە تۇسكەن. «وقۋشى سانىن تولتىرا المايدى, مەكتەپ ارالاس بولسىن» دەپ قارسىلىق تانىتىپ, اقپاراتتىق شابۋىل جاساعاندار دا بولدى. دەگەنمەن جەرگىلىكتى ءبىلىم سالاسىنىڭ باسىندا وتىرعان ازاماتتار دۇرىس شەشىم قابىلداپ, مەكتەپ مەملەكەتتىك تىلدە اشىلدى. بۇگىندە اتالعان وقۋ ۇياسىنا بالالار سىيماي, جاڭادان اشىلىپ وتىرعان №47 مەكتەپكە كەلىپ جاتقانى سونىڭ دالەلى. قالاي دەسەك تە, تۇبىندە مەملەكەتتىك ءتىلدى مەڭگەرگەندەر وزاتىنى ءسوزسىز.
پاۆلودار
