قازاقستان ءۇشىن بۇل توعىزىنشى قىسقى وليمپيادا ويىندارى بولماق. كوماندا سپورتتىڭ 10 ءتۇرى بويىنشا ونەر كورسەتەدى.
2026 جىلعى وليمپيادانىڭ باستى ەرەكشەلىگى – گەندەرلىك تەڭگەرىمنىڭ ساقتالۋى. ۇلتتىق قۇراما ساپىندا تاجىريبەلى سپورتشىلارمەن قاتار, وليمپيادادا العاش رەت باق سىنايتىن دەبيۋتانتتار دا بار. اتاپ ايتقاندا, 18 سپورتشى وليمپيادا ويىندارىنا تۇڭعىش رەت قاتىسادى.
2018 جىلعى وليمپيادانىڭ جۇلدەگەرى يۋليا گالىشەۆا ءوز سپورتتىق مانسابىنداعى بەسىنشى وليمپياداسىن وتكىزەدى. ال شورت-ترەك شەبەرلەرى ابزال اجعاليەۆ پەن دەنيس نيكيشا وليمپيادا ويىندارىنا ءتورتىنشى رەت قاتىسادى.
سونداي-اق كوماندا قۇرامىندا الەم چەمپيوناتتارىنىڭ جۇلدەگەرلەرى ميحايل شايدوروۆ پەن اناستاسيا گورودكو بار.
ۇلتتىق قۇرامانىڭ ەڭ جاس مۇشەسى – 16 جاستاعى اسان اسىلحان. ول ازيا ويىندارىنىڭ جۇلدەگەرى.
ايتا كەتەيىك, 2026 جىلعى XXV قىسقى وليمپيادا ويىندارى 6-22 اقپان ارالىعىندا يتاليانىڭ ميلان جانە كورتينا-د'امپەتستسو قالاسىندا وتەدى.
