فرانتسيادا بورتىندا 148 ادام بولعان ۇشاق اپاتقا ۇشىرادى

استانا. 24 ناۋرىز. بۇگىن فرانتسيادا بورتىندا 148 ادام كەلە جاتقان ۇشاق اپاتقا ۇشىرادى. بۇل تۋرالى شەت ەلدەر باق-تارى حابارلاپ جاتىر. «Airbus 320 ۇشاعى فرانتسيانىڭ وڭتۇستىگىندە قۇلادى», - دەلىنگەن كەلەسى حابارلامادا. «فرانتسيانىڭ تۇستىك بەتكەنيىندە اپاتقا ۇشىراعان Airbus 320 ۇشاعىنىڭ بورتىندا 142 جولاۋشى مەن 6 ەكيپاج مۇشەسى بولعان», - دەلىنگەن تاعى ءبىر اقپاردا. مۇنىڭ الدىندا فرانتسيانىڭ وڭتۇستىك جاعىندا ديۋسسەلدورفتان بريۋسسەلگە ۇشىپ بارا جاتقان جولاۋشىلار ۇشاعىنىڭ جەرگە قۇلاعانى تۋرالى حابارلاما جاسالعان. بەلگىلىسى, اپات بولاردىڭ الدىندا ەكيپاج اۋە كەمەسىنىڭ دابىلىن بەرىپ ۇلگەرگەن. ا320 – ورتاشا قاشىقتىقتاعى اۆياجەلىگە لايىقتانعان ورتا سىيىمدىلىقتاعى ۇشاق. اتالمىش ماركالى لاينەردىڭ قاتىسۋىمەن بولعان سوڭعى ينتسيدەنت وتكەن جىلعى جەلتوقساندا تىركەلگەن. سول جولى بورت ۇشىپ شىققانىنا 42 مينۋت بولعان كەزدە ياۆان تەڭىزىنە قۇلاپ تۇسكەن. ناتيجەسىندە بورتتا بولعان 162 ادام قازا تاپتى. جالپى العاندا, پايدالانۋعا قوسىلعالى بەرى ا320 ماركالى لاينەردىڭ 28-ءى وسىنداي اپاتقا ۇشىراعان ەكەن.  «ارميان اۋە جولدارىنا» قاراستى سونداي ءبىر ۇشاق 2006 جىلعى 3 مامىر كۇنى ادلەر اەروپورتىنا قونار كەزدە جەرگە ۇردى. قونا الماي, ەكىنشى اينالىم جاساپ كەلە جاتىپ قۇلاعان اۋە كەمەسىنىڭ سالونىندا 113 ادام بولعان. ولاردىڭ بارلىعى دا قازا تاپتى. مۇرات ايتقوجا.