قازاقستان سايتتارىنا شەت ەلدەر حاكەرلەرى شابۋىل جاساپ جاتىر

استانا. 24 ناۋرىز. سوڭعى ەكى كۇننەن بەرى بىرقاتار شەت ەلدەردە تۇراتىن حاكەرلەر قازاقستان سايتتارىنا جويقىن شابۋىل جاساپ جاتىر. بۇل تۋرالى ءوزىنىڭ مانبەسىنە سۇيەنگەن ras.kz حابارلادى. قازىر ەلىمىزدىڭ سايت-پورتالدارىن تالقانداپ تاستاۋعا كىرىسكەندەردىڭ ازەربايجان, تۇركيا, يران جانە برازيليا مەملەكەتتەرىندە تۇراتىن حاكەرلەر بولىپ وتىرعانى انىقتالدى. ولاردىڭ اراسىندا, اسىرەسە, الدىڭعى ەكى ەلدەگى بۇزاقىلاردىڭ بەلسەندىلىكتەرى جوعارى. ساراپشىلار حاكەرلەردىڭ بۇگىنگە دەيىن ەلىمىزدەگى 11 سايتقا شابۋىل جاساپ, ولارعا ءارتۇرلى زالال كەلتىرگەندەرىن ايتىپ وتىر. بىراق حاكەرلەر سايتتاردىڭ تەك باسقى بەتتەرىنە عانا ءتيىسىپ وتىرعان سياقتى. ال ولاردىڭ باسقا ماتەريالدارى مەن ارحيۆتەرىن قيراتىپ, بۇلدىرگەندەرى ازىرگە بايقالمايدى. سوعان قاراعاندا, ولاردىڭ ماقساتتارى ينتەرنەت-رەسۋرستاردى تالقانداپ كەتۋ ەمەس, تەك وزدەرىنىڭ قولدارىنان نە كەلەتىنىن بايقاتىپ, قىر كورسەتىپ قويۋ عانا سياقتى. الايدا, پورتالداردىڭ باستاپقى بەتىن وزگەرتە الۋدىڭ وڭاي نارسە ەمەس ەكەنىن دە ەسكەرگەنىمىز ءجون. وعان قولى جەتكەندەر سايت توڭىرەگىندە بىلگەندەرىن ىستەي الادى. سوندىقتان رەسۋرستاردى حاكەرلەر شابۋىلدارىنان قورعاۋدىڭ بارلىق امالدارىن جاساپ باعۋلارىڭىز كەرەك. مۇرات ايتقوجا.