فوتو: istockphoto.com
جاڭا زاڭنامالىق ءتاسىلدىڭ باستى ماقساتى – تەك ءىرى الپاۋىت بانكتەردىڭ ەمەس, نارىققا جاڭادان كەلگەن قاتىسۋشىلاردىڭ دا تۇراقتى دامۋىن قامتاماسىز ەتەتىن تەڭگەرىمدى ورتا قالىپتاستىرۋ. حالىقارالىق تاجىريبەگە سۇيەنسەك, رەسەي, ليتۆا, سينگاپۋر جانە اقش-تا شاعىن بانكتەر ءۇشىن جەكە بازالىق ليتسەنزيا كوزدەلگەن. ەۋروپالىق وداقتا, ۇلىبريتانيادا, شۆەيتساريادا جانە جاپونيادا بىرىڭعاي ليتسەنزيا شەڭبەرىندە تەپە-تەڭ تالاپتار كوزدەلگەن.
ليتسەنزيا تۇرلەرى رۇقسات ەتىلگەن وپەراتسيالاردىڭ كولەمى مەن رەتتەۋشىلىك تالاپتاردىڭ قاتاڭدىعى بويىنشا ەرەكشەلەنەدى:
- شەكتەۋلەر مەن تالاپتار: زاڭ جوباسىندا بازالىق بانكتىك ليتسەنزياسى بار بانكتەر ءۇشىن اكتيۆتەردىڭ ەڭ جوعارى مولشەرى مەن مەنشىكتى كاپيتالدىڭ ەڭ از مولشەرىنە شەكتەۋلەر بەلگىلەنەدى. بۇل رەتتە ناقتى شەكتى ماندەر زاڭعا تاۋەلدى اكتىلەردە ايقىندالادى. قازىرگى كەزەڭدە اكتيۆتەردىڭ مولشەرىن 500 ملرد تەڭگەگە دەيىن جانە كاپيتالدىڭ ەڭ از مولشەرىن 10 ملرد تەڭگەگە دەيىن شەكتەۋ جوسپارلانعان. سونىمەن قاتار مۇنداي بانكتەرگە تاۋەكەلدەردى ازايتۋ ماقساتىندا بەيرەزيدەنتتەر مەن ۇلەستەس تۇلعالارعا نەسيە بەرۋگە تىيىم سالىنادى.
- جەڭىلدەتىلگەن قاداعالاۋ: كىشىگىرىم بانكتەر ءۇشىن پرۋدەنتسيالىق نورماتيۆتەر تومەندەتىلەدى. ولاردى قاداعالاۋ پروتسەسى ايتارلىقتاي جەڭىلدەيدى: جىل سايىنعى تەكسەرۋلەر مەن ەسەپتىلىك تاپسىرۋ جيىلىگى قىسقارىپ, ينسپەكتسيا جۇرگىزۋ تالاپتارى جۇمسارادى.
پرەزيدەنتتىڭ تاپسىرماسىمەن ازىرلەنگەن بۇل زاڭ تەك ليتسەنزيالاۋدى ەمەس, بۇكىل بانك سەكتورىنىڭ زاماناۋي تەحنولوگيالىق وزگەرىستەرگە بەيىمدەلۋىن كوزدەيدى. جاڭا ەرەجەلەر ەكونوميكانى قارجىلاندىرۋداعى بانكتەردىڭ ءرولىن ارتتىرۋعا, قارجىلىق تەحنولوگيالاردى (FinTech) ىلگەرىلەتۋگە جانە تسيفرلىق اكتيۆتەر اينالىمىن ەركىن تۇردە دامىتۋعا باعىتتالعان.
