فوتو: gov.kz
بۇعان دەيىن الەۋمەتتىك جەلىدە مارقۇم نۇراي سەرىكبايدىڭ تۋىستارى ءىستىڭ ءادىل تەرگەلۋىنە قاتىستى ءوتىنىش-تىلەگىن جاريالاعان ەدى.
بۇگىن ىشكى ىستەر مينيسترلىگى اتالعان كىسى ءولىمى فاكتىسى بويىنشا تەرگەۋ بارىسىن باقىلاۋعا العانىن مالىمدەدى.
«شىمكەنت قالاسى پوليتسيا قىزمەتكەرلەرى تاراپىنان ۋاقتىلى شارالار قابىلدانباۋى مۇمكىن دەگەن پىكىرلەر مەن ۋاجدەر بويىنشا قىزمەتتىك تەكسەرۋ تاعايىندالدى. قازىر كۇدىكتى سوت سانكتسياسىمەن قاماۋعا الىندى. ەڭ تاجىريبەلى قىزمەتكەرلەر قاتارىنان ارنايى تەرگەۋ-جەدەل توبى قۇرىلدى. قىلمىستىق ءىس اياسىندا جۇرگىزىلىپ جاتقان تەرگەۋ ارەكەتتەرىنىڭ ناتيجەلەرى بويىنشا كۇدىكتىنىڭ بارلىق ارەكەتىنە قۇقىقتىق باعا بەرىلەدى», دەلىنگەن مينيسترلىك مالىمەتىندە.
قازىر تەرگەۋ-جەدەل ءىس-شارالار كەشەنى جالعاسىپ جاتىر. ءىىم تەرگەۋ بارىسىندا تۇسكەن مالىمەتتەر, سونىڭ ىشىندە بەينەباقىلاۋ كامەرالارىنان الىنعان جازبالار مۇقيات تەكسەرىلىپ, تالداناتىنىن حابارلادى.
سونداي-اق ۆەدومستۆو كىنالى ادام ءتيىستى جازاسىن الۋى ءۇشىن زاڭدا كوزدەلگەن بارلىق شارالاردى قابىلدايتىنىن ەسكەرتىپ وتىر.
ەسكە سالايىق, نۇرايدىڭ ءولىمى بويىنشا كۇدىكتى شەرحان ايماحان دەپ تانىلدى.
مارقۇمنىڭ تۋىستارى كۇدىكتى نۇرايدىڭ ءار قادامىن اڭدىعانىن جەتكىزدى.
ال قۇربىلارى قايعىلى وقيعاعا دەيىن شەرحان ايماحان نۇرايدى ەركىنەن تىس الىپ قاشقانىن ايتتى.
