فوتو: اشىق دەرەككوز
كومپانيا مالىمەتىنشە, 2025 جىلدىڭ جەلتوقسان ايىنىڭ سوڭىندا كتك باعىتىنداعى شەكتەۋلەرگە بايلانىستى قازاقستان مۇنايى قازترانسويل (قتو) جۇيەسى ارقىلى وزگە ەكسپورتتىق مارشرۋتتارعا باعىتتالعان.
«كولەمى شامامەن 300 مىڭ توننا مۇناي قتو جۇيەسىمەن ەكسپورتتىق باعىتتا جەتكىزۋ ءۇشىن قايتا باعىتتالدى. اتاپ ايتقاندا, گەرمانياعا, قىتايعا, باكۋ – تبيليسي – جەيحان باعىتىمەن, سونداي-اق نوۆوروسسيسك پەن ۋست-لۋگا پورتتارى ارقىلى جونەلتىلدى. 2026 جىلدىڭ قاڭتار ايىندا دا قتو تاراپىنان مۇناي قابىلداۋداعى شەكتەۋلەر ساقتالۋىنا بايلانىستى قايتا باعىتتاۋ شارالارى جالعاسادى», دەپ حابارلادى كومپانيا.
ۇلتتىق كومپانيا دەرەگىنە سايكەس, 2025 جىلى گەرمانياعا جەتكىزىلەتىن قازاقستان مۇنايىنىڭ كولەمى ارتقان. شۆەدت قالاسىنداعى مۇناي وڭدەۋ زاۋىتىنا 2,1 ملن توننا مۇناي ەكسپورتتالعان. ال 2026 جىلى بۇل كورسەتكىشتى 2,5 ملن تونناعا دەيىن ۇلعايتۋ جوسپارلانىپ وتىر.
سونىمەن قاتار اقتاۋ پورتى ارقىلى باكۋ – تبيليسي – جەيحان باعىتىمەن تاسىمالدانعان مۇناي كولەمى 1,3 ملن توننانى قۇرادى. الداعى جىلى بۇل كولەم 1,6 ملن تونناعا دەيىن ءوسۋى مۇمكىن. قىتاي باعىتى دا تۇراقتى ساقتالىپ وتىر. 2025 جىلدىڭ قورىتىندىسى بويىنشا قىتاي حالىق رەسپۋبليكاسىنا 1,1 ملن توننا قازاقستان مۇنايى ەكسپورتتالعان.
كونسورتسيۋمدەگى جاعدايعا كەلسەك, وتكەن جىلدىڭ 29 قاراشاسىندا كاسپي قۇبىر كونسورتسيۋمىنىڭ تەڭىز تەرمينالىنا كەزەكتى شابۋىل جاسالىپ, سىرتقى ايلاق قۇرىلعىسى ايتارلىقتاي زاقىمدانعان. بۇعان دەيىن, 25 قاراشادا تۇنگى درون شابۋىلى سالدارىنان نوۆوروسسيسك ماڭىنداعى كقك تەڭىز تەرمينالىنىڭ اكىمشىلىك عيماراتىنا دا زاقىم كەلگەنى حابارلانعان.
قازاقستاننىڭ مۇنايىن تاسىمالدايتىن تانكەرلەر شابۋىلعا ۇشىرادى
وسى وقيعالاردان كەيىن قازاقستاننىڭ ەنەرگەتيكا مينيسترلىگى مۇنايدى بالاما باعىتتارعا بۇرۋ جونىندە مالىمدەگەن بولاتىن. كقك ينفراقۇرىلىمىنا قاتىستى شابۋىلدارعا بايلانىستى پىكىردى حالىقارالىق سەرىكتەستەر دە ءبىلدىردى. اتاپ ايتقاندا, جاعدايعا Chevron كومپانياسى دا تۇسىنىكتەمە جاساعان.
بۇدان بولەك, نوۆوروسسيسكىدەگى «شەسحاريس» ءىرى مۇناي ايلاعىنا جاسالعان درون شابۋىلدارى دا تىركەلدى. بۇل كەشەن ارقىلى دا قازاقستاندىق مۇناي تاسىمالدانادى. ول كەزدە ەنەرگەتيكا مينيسترلىگى مۇناي قابىلداۋ مەن تاسىمالداۋ شتاتتىق رەجيمدە جۇرگىزىلىپ جاتقانىن مالىمدەگەن ەدى.
اقپان ايىندا ۋكراينالىق دروندار كاسپي قۇبىر كونسورتسيۋمىنىڭ «كروپوتكينسكايا» ستانتسياسىنا شابۋىل جاساپ, تاسىمال كولەمىنە ۋاقىتشا شەكتەۋ قويىلعان. كەيىن مۇنداي شابۋىلدار ناۋرىز ايىندا دا قايتالاندى. ارتىنشا ۋكراينا مەن رەسەي كقك نىساندارىنا سوققى جاساماۋ جونىندە كەلىسىمگە كەلگەنى تۋرالى اقپارات تارادى.
قالاي بولعاندا دا, كقك باعىتىنداعى قاتەرلەر قازاقستاندى ەكسپورتتىق لوگيستيكانى ارتاراپتاندىرۋعا يتەرمەلەپ وتىر. ۇلتتىق كومپانيا مالىمەتىنشە, بالاما باعىتتار ارقىلى مۇناي جەتكىزۋ جۇمىسى الداعى ۋاقىتتا دا جالعاسا بەرەدى.
