ء«ورت كەزىندە كومەك سۇراعان داۋىستى ەستىدىم. جاقىندا ينسۋلت الىپ, دارمەنسىز كۇيدە جاتقان كورشىم بىردەن ەسىمە ءتۇستى. سۋلاپ العان فۋتبولكاممەن اۋزى-مۇرنىمدى تۇمشالاپ, قويۋ قارا ءتۇتىن شارپىعان پاتەرگە كىردىم دە, ونى الىپ شىقتىم. ودان كەيىن كوشەدەگى سۋ قۇبىرىنا شلانگ جالعاپ, ءورتتى وشىرۋگە تىرىستىم. بىراق سۋدىڭ قىسىمى ءالسىز بولعاندىقتان, ول مۇمكىن بولمادى. كوپ ۇزاماي ءورت سوندىرۋشىلەر كەلىپ, ءورتتى ءسوندىردى», دەيدى قاتارداعى د.تاڭىربەگەنوۆ.
جاقىندا سەمەيلىك باتىر ىشكى ىستەر مينيسترلىگىنىڭ ۇلتتىق ۇلانى قاتارىنا شاقىرىلدى. قازىرگى ۋاقىتتا ول كۋرچاتوۆ قالاسىندا ورنالاسقان 3514 اسكەري بولىمىندە وتان الدىنداعى بورىشىن وتەپ جاتىر.
دياس ءوزىن بۇرىننان-اق جاۋاپكەرشىلىگى جوعارى ازامات رەتىندە تانىتىپ كەلەدى. قوعام قاۋىپسىزدىگى مەن تىنىشتىعىن قامتاماسىز ەتەتىن قۇقىقتىق ءتارتىپ اسكەرى قاتارىندا ول الداعى ۋاقىتتا دا قىراعىلىعىن ارتتىرىپ, كاسىبي قاسيەتتەرىن جەتىلدىرۋدى كوزدەيدى.
جاس سارباز بەلسەندى سپورتتىق ءومىر سالتىن ۇستانادى جانە قىزمەت بارىسىندا دەنە دايىندىعىن كوتەرۋدى, اسكەري ءتارتىپ پەن جاۋىنگەرلىك داعدىلاردى مەڭگەرۋدى جوسپارلاپ وتىر. قارۋلاستارى ەرلىگىمەن ەلگە تانىلعان اداممەن بىرگە قىزمەت ەتۋ ماقتانىش ەكەنىن ايتادى.
دياس قىزمەت ەتەتىن اسكەري بولىمدە شامامەن 40 سارباز ستراتەگيالىق ماڭىزى بار مەملەكەتتىك نىسانداردى كۇزەتەدى. قازىرگى ۋاقىتتا جاڭادان شاقىرىلعان ساربازدار جاس جاۋىنگەر كۋرسىنان ءوتىپ جاتىر. ودان كەيىن اسكەري انت قابىلداۋ ءراسىمى وتەدى.
