«بىرقاتار ەۋروپالىق مەملەكەتتەردىڭ ەلشىلەرىمەن وتكىزىلگەن شۇعىل كەزدەسۋلەر, سونداي-اق امەريكالىق تاراپپەن جانە وزگە دە شەتەلدىك سەرىكتەستەرمەن بولعان بايلانىستار بارىسىندا حالىقارالىق قۇقىق نورمالارىن قاتاڭ ساقتاي وتىرىپ, كومىرسۋتەگىن تاسىمالداۋدىڭ, ونىڭ ىشىندە تەڭىز جولدارىنداعى قاۋىپسىزدىگىن قامتاماسىز ەتۋ بويىنشا قاجەتتى شارالار قابىلداۋدىڭ ماڭىزدىلىعىنا ەرەكشە ءمان بەردىك», دەلىنگەن مالىمدەمەدە.
رەسمي وكىل ەرلان جەتىباەۆ ەلىمىز قانداي دا ءبىر قارۋلى قاقتىعىسقا قاتىسۋشى بولىپ تابىلمايتىنىن, جاھاندىق جانە ەۋروپالىق ەنەرگەتيكالىق قاۋىپسىزدىكتى نىعايتۋعا ەلەۋلى ۇلەس قوسىپ كەلە جاتقانىن ءارى ەنەرگيا رەسۋرستارىن جەتكىزۋدى حالىقارالىق تالاپتارعا تولىق سايكەس قامتاماسىز ەتىپ وتىرعانىن ەرەكشە اتاپ ءوتتى.
«وسىعان بايلانىستى اتالعان تانكەرلەردىڭ بارلىق قاجەتتى رۇقساتتارى بولعانىن جانە تالاپ ەتىلەتىن سايكەستەندىرۋ جابدىقتارىمەن قامتاماسىز ەتىلگەنىن اتاپ كورسەتەمىز. سوڭعى ۋاقىتتا مۇنداي وقيعالاردىڭ جيىلەۋى حالىقارالىق ەنەرگەتيكالىق ينفراقۇرىلىمنىڭ قالىپتى جۇمىس ىستەۋىنە تونەتىن تاۋەكەلدەردىڭ ارتىپ كەلە جاتقانىن ايعاقتايتىنىن اتاپ وتەمىز جانە سەرىكتەستەرىمىزدى الداعى ۋاقىتتا وسىنداي وقيعالاردىڭ الدىن الۋ ماقساتىندا بىرلەسكەن شارالار ازىرلەۋ ءۇشىن تىعىز ءوزارا ءىس-قيمىل جاساۋعا شاقىرامىز», دەلىنگەن مالىمدەمەدە.
ايتا كەتەيىك, بۇعان دەيىن ەنەرگەتيكا مينيسترلىگى 13 قاڭتاردا قارا تەڭىز اكۆاتورياسىندا كاسپي قۇبىر كونسورتسيۋمىنىڭ (كقك) تەڭىز تەرمينالى ماڭىندا قازاقستان مۇنايىن تاسىمالدايتىن ەكى كەمەگە شابۋىل جاسالعانىن راستاعان ەدى.
ەسكە سالايىق, 29 قاراشادا استانا ۋاقىتىمەن 06:06-دا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجسىز ءجۇزۋ قۇرالدارى ارقىلى شابۋىل جاسالعان ەدى. ناتيجەسىندە تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالدى. ەرمەك كوشەرباەۆ كتك-عا جاسالعان شابۋىلدى ۋكراينا تاراپىمەن تالقىلادى. ەنەرگەتيكا ءمينيسترى ەرلان اقكەنجەنوۆ كتك-عا تولىققاندى بالاما جوق ەكەنىن, ال وزگە باعىتتار تەك جۇكتىڭ بەلگىلى ءبىر بولىگىن عانا تاسىمالداي الاتىنىن ايتقان ەدى. سونىمەن قاتار ماجىلىس دەپۋتاتى ايدوس سارىم الەۋمەتتىك جەلىلەردە كاسپي قۇبىر كونسورتسيۋمىنىڭ تەرمينالىنا جاسالعان شابۋىلدى قولداعان ازاماتتاردى جاۋاپقا تارتۋدى تالاپ ەتتى.
