كوللاجدى جاساعان – قونىسباي شەجىمباي, «EQ»
قور نەگىزىنەن الەۋمەتتىك ماڭىزى بار, باعدارلامالىق جوبالاردى جۇزەگە اسىرادى. وسى باعىتتاعى اۋقىمدى باستامالارعا قولداۋ جاسايدى. قيىن جاعدايعا تاپ بولعان, از قامتىلعان, كوپبالالى, مۇگەدەكتىگى بار ازاماتتارعا ناقتى ماتەريالدىق كومەك كورسەتەدى. بارلىق قارجى ەكى باعىتقا – اتاۋلى كومەك پەن دامۋ باعدارلامالارىنا ءبولىنىپ وتىرادى. اتاۋلى كومەككە قاراعاندا, دامۋ جوبالارىنىڭ باسىندا ناقتى ادامدار ەمەس, حالىقتىڭ تۇتاس توپتارى تۇرادى. كومەكتىڭ ەكى ءتۇرىن دە الۋشىلار ساناتى ەلىمىزدىڭ الەۋمەتتىك دامۋىنىڭ باسىم باعىتتارىن نەگىزگە الا وتىرىپ, قور تۇجىرىمداماسىندا ناقتى بەلگىلەنگەن.
قور دەنساۋلىق ساقتاۋ سالاسىندا قىمبات ەم-دوم قاجەت ەتەتىن ناۋقاستارعا كومەك كورسەتەدى, سيرەك كەزدەسەتىن اۋرۋلارعا شالدىققان بالالاردى ەمدەۋگە قارجى بولەدى, شالعاي اۋىلدارعا مەديتسينالىق قىزمەتتى قولجەتىمدى ەتۋگە اتسالىسادى.
ءبىلىم بەرۋ سالاسىندا دارىندى, بىراق الەۋمەتتىك جاعدايى تومەن وقۋشىلار مەن ستۋدەنتتەرگە شاكىرتاقى تاعايىندايدى. اۋىل مەكتەپتەرىن قۇرال-جابدىقتارمەن تولىقتىرىپ, ينكليۋزيۆتى ءبىلىم بەرۋ قۇرالدارىمەن قامتاماسىز ەتىپ وتىرادى. اۋىلدىق جەرلەردە سپورت الاڭدارىن, رۋحانيات نىساندارىن سالۋ, ەرەكشە قاجەتتىلىگى بار جاندارعا كەدەرگىسىز ورتا قالىپتاستىرۋ جۇمىستارىمەن جۇيەلى شۇعىلدانادى.
قور قۇرىلعالى بەرگى ءۇش جىل ىشىندە بىرقاتار ناقتى ناتيجەگە قول جەتكىزدى. ايتاپ ايتقاندا, 2022 جىلدان بەرى 2 500-دەن استام بالاعا سيرەك كەزدەسەتىن اۋرۋلاردى ەمدەۋگە كومەك كورسەتىلدى. 10 مىڭنان استام ستۋدەنت پەن وقۋشى ءبىلىم گرانتى مەن شاكىرتاقىعا يە بولدى. ەل كولەمىندە 200-گە جۋىق ارنايى جابدىقتالعان بولمە مەن پسيحولوگيالىق-پەداگوگيكالىق كومەك ورتالىعى اشىلدى. 32 اۋداندىق اۋرۋحانا مەن امبۋلاتوريانى زاماناۋي قۇرالدارمەن جابدىقتاۋعا قارجى ءبولىندى. جالپى, قور وسى كەزەڭدە 130 ملرد تەڭگەدەن استام قاراجاتتى الەۋمەتتىك جوبالارعا باعىتتاعان.
قور تولىعىمەن ەرىكتى قايىرىمدىلىق ەسەبىنەن جۇمىس ىستەيدى. قارجى ءىرى كاسىپكەرلەر مەن كومپانيالاردىڭ اۋدارىمدارى, جەكە تۇلعالاردىڭ اتاۋلى جارنالارى, مەملەكەتتەن تىكەلەي قارجىلاندىرۋ ەمەس, قوعامدىق قولداۋ ارقىلى تۇسەدى.
قور جۇمىسى اشىقتىق قاعيداتتارىنا ساي جۇرگىزىلەدى. ارنايى سايتتا بارلىق ءتۇسىم مەن شىعىندار تۋرالى مالىمەت تۇراقتى جاريالانىپ تۇرادى. قاراجات ناقتى جوبالار مەن كومەككە مۇقتاج ادامدارعا باعىتتالادى. وتىنىشتەر مەن ۇسىنىستار ونلاين رەجىمدە قابىلدانادى.
قور الداعى ۋاقىتتا دا حالىقتىڭ الەۋمەتتىك ءالسىز توپتارىنا ۇزاقمەرزىمدى قولداۋ كورسەتۋ, مەديتسينالىق ساقتاندىرۋ جۇيەسىن تولىقتىرۋشى قۇرال رەتىندە قىزمەت ەتۋ, اۋىلدىق جەرلەر مەن ايماقتاردا ساپالى ءومىر سۇرۋگە مۇمكىندىك جاساۋ, بالالار مەن جاستاردىڭ دامۋىنا ينۆەستيتسيا سالۋ جۇمىستارىن جۇيەلى, ماقساتتى تۇردە جالعاستىرا بەرەدى.
تۇيىندەي كەلگەندە, «قازاقستان حالقىنا» قورى – مەملەكەتتىك ەمەس, حالىقتىق سيپاتتاعى ءىرى الەۋمەتتىك جوبا. قىزمەتى الەۋمەتتىك ادىلەتتىلىك, قايىرىمدىلىق پەن ازاماتتىق جاۋاپكەرشىلىك قاعيداتتارىنا نەگىزدەلگەن. مەملەكەتتىڭ قولىن ۇزارتاتىن, قوعامنىڭ جۇرەگىنە جاقىن, ءوزارا سەنىمگە قۇرىلعان بىرەگەي قۇرىلىم.
