سۋرەتتى تۇسىرگەندەر – دميتري ەروفەەۆ, جۇماباي مۇسابەكوۆ
بۇلاي دەيتىن سەبەبىمىز, بۇعان دەيىن وقۋشىلار اتالعان مەكتەپتە 9-سىنىپقا دەيىن ءبىلىم السا, 10-11 سىنىپ وقۋشىلارى باسقا ەلدى مەكەندەگى مەكتەپتەرگە قاتىناپ وقيتىن ەدى. ارنايى اۆتوبۋس بەكىتىلىپ, بالالاردى كورشى اۋىلعا تاسىمالدايتىن. ەندى بۇل ماسەلە تۇبەگەيلى شەشىلدى. ونى اشىلۋ سالتاناتىندا ءسوز العان وبلىس باسشىسىنىڭ ورىنباسارى دياس ەسداۋلەتوۆ جەتكىزدى.
«پرەزيدەنتتىڭ تاپسىرماسىنا سايكەس وڭىردە قالا مەن اۋىل مەكتەپتەرىندەگى وقىتۋ دەڭگەيىن تەڭەستىرۋ جۇمىستارى جۇرگىزىلىپ كەلەدى. مەكتەپ عيماراتتارىن جاڭارتۋ, ماتەريالدىق-تەحنيكالىق بازالارىن نىعايتۋ كەزەڭ-كەزەڭىمەن اتقارىلىپ جاتىر. ماسەلەن, وسى كولتابان اۋىلىنداعى مەكتەپتە بالالار ۇزاق جىلدان بەرى بەيىمدەلگەن عيماراتتا وقىپ كەلگەن. بۇگىن, مىنە, اۋىلدا 120 ورىندىق زاماناۋي مەكتەپ پايدالانۋعا بەرىلىپ, جايلى ءارى قاۋىپسىز ءبىلىم الۋعا مۇمكىندىك جاسالىپ وتىر. عيمارات زاماناۋي تالاپقا ساي جابدىقتالعان. ءبىز ءبىلىم سالاسىنا قولداۋ شارالارىن بۇدان بىلاي دا جالعاستىرامىز. جاڭا مەكتەپ ۇستازدارىنىڭ باستامالارى باياندى, ەڭبەكتەرى جەمىستى بولسىن. ال وقۋشىلارعا ايتارىم, وسى مەكتەپتەن ساپالى ءبىلىم الىپ, ەلىمىزدىڭ دامۋىنا ۇلەس قوساتىن ادال ازامات بولىپ وسۋلەرىڭىزگە تىلەكتەسپىن», دەگەن ول, جاڭا موديفيكاتسياداعى حيميا كابينەتىنىڭ جابدىقتارىن ساتىپ الۋعا ارنالعان سەرتيفيكات تابىستادى.
بۇدان سوڭ مەكتەپتىڭ قۇرىلىسىن جۇرگىزگەن مەردىگەر ۇيىم — «سپ NEFT» جشس ديرەكتورى نۇرلان قادىرباەۆ جاڭا مەكتەپتىڭ سيمۆوليكالىق كىلتىن ءبىلىم مەكەمەسىنىڭ ديرەكتورى جامبى بىرجانوۆاعا تابىستادى. عيماراتتىڭ لەنتاسى قيىلىپ, مەكتەپ سالتاناتتى تۇردە اشىلعاننان كەيىن قوناقتار ءبىلىم وشاعىنىڭ ءىشىن ارالاپ كوردى.
ءوڭىر اكىمىنىڭ ءباسپاسوز قىزمەتىنىڭ مالىمەتىنشە, ءۇش قاباتتى جاڭا مەكتەپ عيماراتىندا 11 پاندىك كابينەت, 2 شەبەرحانا, كىتاپحانا, سپورت جانە اكت زالدارى, اسحانا, سول سياقتى 25 بالاعا ارنالعان مەكتەپكە دەيىنگى شاعىن ورتالىق بار. بۇعان دەيىن بۇل ورتالىق تەك تۇسكە دەيىن عانا جۇمىس ىستەسە, قازىر بارلىق مۇمكىندىك جاسالعاندىقتان تولىق جۇمىس كۇنىنە كوشكەن.
جەرگىلىكتى تۇرعىندار جاعىمدى جاڭالىققا قاتىستى پىكىرىمەن ءبولىستى. ولاردىڭ قاتارىندا اتا-انالار, مۇعالىمدەر مەن وقۋشىلار دا بار.
«ەڭ الدىمەن, ءبىز ءۇشىن ەڭ ۇلكەن قۋانىش – ەندى بالالارىمىز وزدەرىنىڭ تۋعان اۋىلىنان كورشىلەس ەلدى مەكەندەرگە قاتىناپ وقىمايتىن بولدى. مەكتەپتە وقۋشىلاردىڭ ساپالى ءبىلىم الۋىنا, ال ءبىز ءۇشىن جايلى جۇمىس ىستەۋگە بارلىق جاعداي جاسالعان. قاجەتتى قۇرال-جابدىقتارمەن تولىق قامتىلعان زاماناۋي پاندىك كابينەتتەرىمىز بار. اتاپ ايتقاندا, زەرتحاناسى بار فيزيكا كابينەتى, لينگافون كابينەتى, ينفورماتيكا كابينەتى جابدىقتالعان, بارلىعىندا پانەلدى تاقتالار ورناتىلعان. مۇنىڭ ءبارى ءپاندى تەرەڭ ءارى جان-جاقتى تۇسىنۋگە, سونداي-اق عىلىمي زەرتتەۋ جۇمىستارىمەن اينالىسۋعا مۇمكىندىك بەرەدى», دەدى قازاق ءتىلى مەن ادەبيەتى ءپانىنىڭ مۇعالىمى
ەرجان ءبىرجانوۆ.
سول سياقتى كولتابان اۋىلى تۇرعىندارىنىڭ اتىنان ارداگەر مۇرات راحىموۆ باتاسىن بەرسە, اۋىل تۇرعىنى باقىت لەباەۆا جەرلەستەرىن قۇتتىقتادى.
«بۇرىنعى مەكتەبىمىز ەسكى ەدى. ەندى اۋىل شاعىن بولسا دا, بالالارىمىز بەن نەمەرەلەرىمىز ءۇشىن كەڭ, جارىق, زاماناۋي مەكتەپ سالىنىپ وتىر. سونىمەن قاتار مەكتەپتە كىشكەنتاي بالالارعا ارنالعان جاڭا ورتالىق تا بار. بۇل – ۇلكەن قۋانىش. وسى ىسكە ۇلەس قوسقان بارشا ازاماتقا شىنايى العىسىمدى بىلدىرەمىن», دەدى ول.
ەڭ عاجابى, جوعارى سىنىپ وقۋشىلارىنىڭ قۋانىشىندا شەك بولعان جوق. ماسەلەن, 11-سىنىپ وقۋشىسى جاڭىل تۇركىستان جاڭا نىساندى جاقسى ىرىمعا بالاپ, جاقسى وقۋعا ۋادە ەتتى.
«9-سىنىپقا دەيىن وسى اۋىلداعى مەكتەپتە وقىدىم. الايدا مۇندا جوعارى سىنىپتار بولماعاندىقتان, تالدىقورعان قالاسىنا بارىپ, №19 مەكتەپتە 10-سىنىپتى اياقتادىم. جاڭا مەكتەپ سالىنعانىنا قاتتى قۋانىپ, ۇلكەن ىقىلاسپەن ءوز اۋىلىما قايتىپ كەلدىم. مەكتەپ ماعان وتە ۇنادى, قالا مەكتەپتەرىنەن ەشبىر ايىرماشىلىعى جوق — ءبارى ادەمى, جايلى ءارى زامانعا لايىق», دەدى وقۋشى.
جەتىسۋ وبلىسى
