مەكەمە قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قارايدى. زەينەتكەرلەر كۇن سايىن وسىندا كەلىپ, 4 ساعات بويلارىن سەرگىتىپ, الەۋمەتتىك قىزمەتتەر الادى. قالادا اتالعان ورتالىقتىڭ 4 بولىمشەسى جۇمىس ىستەيدى. كۇندەلىكتى 800-گە جۋىق زەينەتكەر مەن ەڭبەك ارداگەرلەرى وسى مەكەمەدە ەم الىپ, دەمالىپ كەتەدى. 2025 جىلى «بەلسەندى ۇزاق ءومىر» ورتالىعى 10 مىڭعا جۋىق زەينەت جاسىنداعى ازاماتتارعا مەديتسينالىق, ساۋىقتىرۋ ەم شارالارىن كورسەتىپ, مادەني ءىس-شارالار ۇيىمداستىرىپتى.
ورتالىققا كەلگەن ارداگەرلەر الدىمەن دارىگەرلىك تەكسەرۋدەن ءوتىپ, سودان كەيىن ءوز قالاۋىنا ساي قىزمەت الادى. مەكەمە تاڭعى سەرگىتۋ جاتتىعۋلارى, فيتوبار, فيزيوتەراپيا كابينەتى, پسيحولوگ كەڭەسى, ترەناجەر زالى, ماسساج, ەمدىك دەنە شىنىقتىرۋ, حورەوگرافيا, يوگا, باسسەين, تۇزدى كەنىش سەكىلدى ساۋىقتىرۋ قىزمەتتەرىمەن قامتىلعان. سونداي-اق بەينەلەۋ جانە قىش ونەرى دە ارداگەرلەردىڭ بوس ۋاقىتىن ءتيىمدى وتكىزۋگە كومەكتەسەدى.
مۇندا زەينەتكەرلەردەن قۇرالعان ونەر توپتارى ءتۇرلى حالىقارالىق بايقاۋلاردا جۇلدەلى ورىن الىپ ءجۇر. ماسەلەن «جىبەك» اجەلەر بي توبى الماتى قالاسىندا وتكەن I حالىقارالىق «GOLDEN GRACE 60+» بي كونكۋرسىندا III ورىندى يەلەنسە, تاشكەنت قالاسىندا وتكەن «ازيا ورنەكتەرى» حالىقارالىق فەستيۆالىندە «قازىنا» بي توبى I ورىن مەن گران-پري جۇلدەسىن جەڭىپ الدى.
94 جاستاعى قاريا قاجىلىققا جيناعان قاراجاتىن سىرقات بالالارعا ءبولىپ بەردى
