فيفا ناسىلشىلدىكپەن كۇرەستىڭ جاڭا جۇيەسىن تانىستىردى

استانا. 12 مامىر. فۋتبولدان 2018 جىلى رەسەيدە وتەتىن الەم چەمپيوناتىندا ناسىلشىلدىكپەن كۇرەس قاتاڭ جۇرگىزىلەتىن بولدى. وسى ماقساتتا فيفا جاڭا جۇيەنىڭ تۇساۋىن كەستى. بۇل تۋرالى interfax.ru حابارلادى. جاڭا ەرەجەگە سايكەس, ويىن بارىسىندا جول بەرىلگەن كەمسىتۋشىلىكتەردى تىركەپ وتىراتىن ارنايى باقىلاۋشىلار جۇمىس ىستەيدى. ناتيجەسىندە فيفا وكىلدەرى انىقتاعان كەلەڭسىزدىكتەر ماتچتىڭ حاتتاماسىنا تىركەلەدى. سوعان سايكەس كىنالى تاراپ جازالاناتىن بولادى. جاڭا جۇيەنىڭ تۇساۋ كەسۋ راسىمىنە افريكا قۇرلىعىنىڭ وكىلى, كوت د-يۆۋار قۇراماسى مەن انگليانىڭ «مانچەستەر سيتي» كومانداسىنىڭ ويىنشىسى يايا تۋرە قاتىستى. بۇل فۋتبولشى بىرنەشە جىل بۇرىن ماسكەۋدىڭ تسسكا-سىندا ويناپ جۇرگەن كەزىندە ناسىلىنە بايلانىستى جانكۇيەرلەر تاراپىنان تالاي مارتە كەمسىتۋگە ۇشىراعان ەدى. ايتا كەتەيىك, 2018 جىلعى الەمدىك دوپ دوداسى رەسەيدىڭ 11 قالاسىندا ورنالاسقان 12 ستاديوندا وتەدى. فۋتبول تويى وتەتىن قالالار: ماسكەۋ, سانكت-پەتەربۋرگ, كالينينگراد, قازان, ۆولگوگراد, نيجني نوۆگورود, سامارا, سارانسك, ەكاتەرينبۋرگ, روستوۆ جانە سوچي. ەلامان قوڭىر. دەرەك: interfax.ru. سۋرەت: fifa.com.