فوتو: istockphoto.com
قمدب مالىمەتىنشە, قاسيەتتى رامازان ايىنىڭ العاشقى كۇنى 19 اقپانعا سايكەس كەلەدى. ال قادىر ءتۇنى 16 ناۋرىزدان 17 ناۋرىزعا قاراعان ءتۇنى وتەدى.
ەلىمىزدەگى مۇسىلماندار ورازا ايت مەرەكەسىن 20 ناۋرىز كۇنى اتاپ وتەدى. ال قاسيەتتى قۇربان ايت مەرەكەسى بيىل 27-29 مامىر ارالىعىندا تويلانادى.
(فوتو: muftyat.kz)
بۇعان دەيىن قمدب وكىلدەرى ھيجري ايلاردىڭ باستالۋى حالىقارالىق استرونوميالىق زەرتتەۋ ورتالىقتارىنىڭ دەرەكتەرىنە نەگىزدەلەتىنىن اتاپ وتكەن بولاتىن. وسىعان بايلانىستى قمدب ەل تۇرعىندارىن ءدىني مەرەكەلەردىڭ ناقتى كۇندەرى جاڭا ايدىڭ تۋىنا قاراي ءبىر كۇن ەرتە نەمەسە كەش بەلگىلەنۋى مۇمكىن ەكەنى جونىندە ەسكەرتتى.
قمدب-نىڭ رەسمي سايتى حابارلاعانداي, رامازان ايى – مۇسىلمان كۇنتىزبەسىندەگى توعىزىنشى اي. بۇل اي مۇسىلماندار ءۇشىن ەڭ ماڭىزدى ءارى قاسيەتتى كەزەڭ سانالادى. «رامازان» ءسوزى اراب تىلىنەن اۋدارعاندا «اپتاپ ىستىق», «كۇيدىرەتىن», «وتە ىستىق» دەگەن ماعىنالاردى بىلدىرەدى.
قۇربان ايت – يسلامداعى ەڭ ۇلكەن مەرەكەلەردىڭ ءبىرى. ول مەككەگە قاجىلىقتىڭ اياقتالۋىن بىلدىرەدى جانە يسلامنىڭ بەس پارىزىنىڭ ءبىرى بولىپ سانالاتىن قاجىلىقتى تامامداۋمەن بايلانىستى. بۇل مەرەكە ادامنىڭ يماندىلىعى مەن ادامگەرشىلىك قاسيەتتەرىن ارتتىرۋعا باعىتتالعان.
