مۇنداي اكتسيالار ەل استاناسىندا مادۋرو مەن ونىڭ جۇبايى ۇستالعان ساتتەن باستاپ كۇن سايىن ءوتىپ كەلەدى. كوشەدەگى نارازىلىقتار اياسىندا ۆەنەسۋەلانىڭ سىرتقى ىستەر مينيسترلىگى 2019 جىلى دونالد ترامپتىڭ العاشقى پرەزيدەنتتىك مەرزىمى كەزىندە ۇزىلگەن ديپلوماتيالىق قاتىناستاردى قالپىنا كەلتىرۋ ماسەلەسى بويىنشا اقش-پەن كەلىسسوزدەر باستالعانىن مالىمدەدى.
ۆاشينگتون ۆەنەسۋەلانىڭ مۇناي سالاسىنا 100 ملرد دوللار ينۆەستيتسيا سالادى
اقش بيلىگى ەلشىلىكتىڭ جۇمىسىن قايتا جانداندىرۋدى تالقىلاۋ ءۇشىن امەريكالىق دەلەگاتسيانىڭ كاراكاسقا بارعانىن راستادى. وسى ۋاقىتتا پرەزيدەنت مىندەتىن ۋاقىتشا اتقارۋشى دەلسي رودريگەس بىرقاتار ساياسي تۇتقىنداردىڭ بوساتىلعانىن جاريالادى. قۇقىق قورعاۋشىلاردىڭ دەرەگىنشە, 10 قاڭتارعا دەيىن 18 ادام بوستاندىققا شىققان.
قالعان تۇتقىنداردىڭ تۋىستارى كاراكاستىڭ شىعىسىنداعى ەل-رودەو تۇرمەسىنىڭ ماڭىندا كەزەكشىلىك جاساپ, الداعى ۋاقىتتا تاعى دا بوساتۋلار بولادى دەپ ۇمىتتەنىپ وتىر. قۇقىق قورعاۋ ۇيىمدارىنىڭ مالىمەتىنشە, قازىرگى ۋاقىتتا ۆەنەسۋەلادا 850-دەن استام ساياسي تۇتقىن بار, ولاردىڭ باسىم بولىگى مادۋرو بيلىگى كەزىندە ۇستالعان.
ەسكە سالايىق, 3 قاڭتاردا اقش كاراكاسقا شابۋىل جاساپ, ۆەنەسۋەلا پرەزيدەنتى نيكولاس مادۋرو مەن ونىڭ جۇبايى سيليا فلورەستى تۇتقىنداعان. نيۋ-يورك سوتىندا ولارعا ناركوتەرروريزم, كوكاين تاسىمالداۋ, قارۋدى زاڭسىز ساقتاۋ جانە ءسوز بايلاسۋ باپتارى بويىنشا ايىپ تاعىلعان. نيكولاس مادۋرو بۇل ايىپتاۋلاردى جوققا شىعارادى.
