مەملەكەت باسشىسى قاسىم-جومارت توقاەۆتىڭ تاپسىرماسىمەن سالىنعان «كەلەشەك مەكتەپتەرى» جوباسى ەلىمىزدە ساپالى ءبىلىم بەرۋ ينفراقۇرىلىمىن قالىپتاستىرۋعا باعىتتالعان. جوبا اياسىندا رەسپۋبليكا بويىنشا 460 مىڭ وقۋشىعا ارنالعان 217 مەكتەپ سالىندى. جوباعا قاراستى 84 مەكتەپ اۋىلداردا اشىلدى. قىزىلوردا وبلىسىندا 7 مىڭ بالانىڭ ءبىلىم الۋىنا مۇمكىندىك بەرەتىن 10 «كەلەشەك مەكتەپتىڭ» ەكەۋى ارال اۋدانىندا ورنالاسقان.
مەرگەنساي اۋىلىنداعى جاڭا مەكتەپ زاماناۋي تالاپتارعا ساي جابدىقتالعان جانە اۋىل بالالارى ءۇشىن قولجەتىمدى, قاۋىپسىز ءارى ساپالى ءبىلىم الۋ ورتاسىن قالىپتاستىرۋعا باعىتتالعان. ءبىلىم نىسانى وقۋشىلاردىڭ قابىلەتىن دامىتۋعا, وقۋ پروتسەسىن جاقسارتۋعا جانە اۋىلدىق جەرلەردەگى ءبىلىم ساپاسىن ارتتىرۋعا مۇمكىندىك بەرەدى.
− بۇگىن مىنە ارال اۋدانىنىڭ ەڭ شالعاي اۋىلى مەرگەنسايدا جاڭا مەكتەپ اشىلدى. بۇل مەكتەپ «كەلەشەك مەكتەپتەرىنىڭ» ستاندارتىمەن سالىنعان. ءبىز بۇگىن حالىقارالىق تالاپتارعا ساي مەكتەپتىڭ اۋىلعا جەتكەنىنىڭ كۋاسى بولدىق. مەملەكەت باسشىسى قاسىم-جومارت كەمەل ۇلى توقاەۆتىڭ ۇستازدارعا دەگەن قامقورلىعى ەرەكشە, سونىڭ ارقاسىندا مۇعالىمدەردىڭ قوعامداعى مارتەبەسى ارتا ءتۇستى. بۇگىندە ۇستاز ماماندىعى ەلىمىزدەگى ەڭ تارتىمدى ماماندىقتاردىڭ بىرىنە اينالدى. جاڭا مەكتەپتىڭ ۇجىمىن, وقۋشىلاردى, اتا-انالاردى وسى قۋانىشپەن قۇتتىقتايمىن, − دەدى وقۋ-اعارتۋ ءمينيسترى جۇلدىز سۇلەيمەنوۆا.
سالا ءمينيسترى سونىمەن قاتار قىزىلوردا وبلىسىنىڭ قارماقشى اۋدانىنىڭ بايقوڭىر قالاسىندا ورنالاسقان №277 مەكتەپ-ليتسەيدىڭ جۇمىسىمەن تانىستى. «قازاقستان حالقىنا» قورى بۇل وقۋ ورداسىنا 245 ملن تەڭگە كولەمىندە قاراجات ءبولىپ, مەكتەپتىڭ ماتەريالدىق-تەحنيكالىق بازاسىن جاڭارتتى.
وقۋ-اعارتۋ مينيسترلىگى ءۇشىن مەكتەپ ينفراقۇرىلىمىن دامىتۋ, اۋىل مەن قالا اراسىنداعى ءبىلىم بەرۋ ساپاسىنداعى الشاقتىقتى ازايتۋ جانە ءاربىر بالاعا تەڭ مۇمكىندىك بەرۋ نەگىزگى باسىمدىقتاردىڭ ءبىرى. مينيسترلىك وسى باعىتتاعى جۇيەلى جۇمىستى جالعاستىرادى.
