قالانىڭ 31-ءشى كىتاپحاناسىنا اينالعان جاڭا نىسان وقۋ ءداستۇرىنىڭ قۇندىلىقتارىن تسيفرلىق تەحنولوگيالارمەن, زاماناۋي ءبىلىم, كەڭ اۋقىمدى اقپاراتتىق رەسۋرستارمەن ۇشتاستىرا الادى.
كىتاپحانانىڭ اشىلۋ راسىمىنە الماتى تۇرعىندارى, قالا باسشىلىعىنىڭ وكىلدەرى, بەلگىلى جازۋشىلار, قوعام قايراتكەرلەرى جانە مادەني قاۋىمداستىق وكىلدەرى قاتىستى.
كىتاپحانا تۇساۋكەسەرىندە الماتى قالاسى اكىمىنىڭ ورىنباسارى ابزال نۇكەنوۆ ءسوز سويلەپ, قالانىڭ ءار اۋدانىندا مادەني ورتالىقتار مەن كىتاپحانالاردى اشۋ – الەۋمەتتىك ينفراقۇرىلىمدى تۇرعىندار ءۇشىن قولجەتىمدى ەتۋگە باعىتتالعان ماڭىزدى ءىستىڭ ءبىرى ەكەنىن اتاپ ءوتتى.
كىتاپحانا زاماناۋي تالاپتارعا ساي قالىپتاسقان اۋقىمدى كىتاپ قورى مەن جەتىلدىرىلگەن ماتەريالدىق-تەحنيكالىق مۇمكىندىكتەرىنىڭ ارقاسىندا جاسى مەن قىزىعۋشىلىعى ءارتۇرلى وقىرمانداردىڭ قاجەتتىلىگىن تولىق قامتاماسىز ەتەدى.
مۇندا كومپيۋتەرمەن جۇمىس ىستەۋگە ارنالعان ارنايى زال, جەكە وقۋ ءۇشىن قولايلى تىنىش ايماقتار, سونداي-اق بىرلەسكەن كەزدەسۋلەر مەن شىعارماشىلىق باستامالاردى جۇزەگە اسىرۋعا لايىقتالعان كەڭىستىكتەر قاراستىرىلعان.
سونىمەن قاتار, كىتاپحانانىڭ باستى ەرەكشەلىكتەرىنىڭ ءبىرى - ەرەكشە قاجەتتىلىگى بار ازاماتتار ءۇشىن ارنايى بەيىمدەلگەن جۇمىس ورىندارى قاراستىرىلعان. ولار كوزى ناشار كورەتىن جانە زاعيپ وقىرماندارعا ارنالعان برايل باعدارلامالارى مەن دىبىستىق ينتەرفەيستەرمەن جابدىقتالعان.
«مۇنداي جاڭا ءارى زاماناۋي كىتاپحانالاردىڭ اشىلۋى – وي مەن ءبىلىمدى توعىستىرىپ, ۇلت رۋحانياتىن جاڭا دەڭگەيگە كوتەرەتىن ماڭىزدى مادەني كەڭىستىك. بۇل باستاما وقىرمان مادەنيەتىنىڭ دامۋىنا زور سەرپىن بەرەدى دەپ سەنەمىن», دەدى قازاقستان جازۋشىلار وداعىنىڭ توراعاسى مەرەكە قۇلكەنوۆ.
جاڭا كىتاپحانانىڭ اشىلۋى قالانىڭ مادەني ينفراقۇرىلىمىن دامىتۋدىڭ ماڭىزدى قادامى بولىپ, الماتىلىقتار ءۇشىن جاڭا تارتىمدى ورتالىققا اينالماق. كىتاپحانانىڭ باستى ارتىقشىلىقتارىنىڭ ءبىرى – 20 مىڭعا دەيىن كىتاپتى قامتيتىن باي ءارى مازمۇندى كىتاپ قورى.
بۇگىنگى تاڭدا الماتى قالاسىندا 31 قالالىق كىتاپحانا بار بولسا, ولاردىڭ ۇشەۋى تاۋلىك بويى قىزمەت كورسەتەدى.
