باتىس قازاقستان وبلىسى ىشكى ىستەر دەپارتامەنتىنە تەكسەرۋ جۇرگىزىلۋدە

ورال. 12 مامىر. باتىس قازاقستان وبلىستىق ىشكى ىستەر دەپارتامەنتىنىڭ قىزمەتىنە قازاقستان رەسپۋبليكاسى ىشكى ىستەر مينيسترلىگى تاراپىنان تەكسەرۋ جۇرگىزىلمەك. وعان ورال قالاسىندا شىعاتىن اپتالىق گازەتتەر رەداكتسيالارىنىڭ بىرىنە جولدانعان دومالاق ارىز سەبەپ بولعان. اتى-جوندەرى كورسەتىلمەگەن شاعىم حاتتىڭ اياعىنا ءبىر اۋىز سوزبەن «ىشكى ىستەر دەپارتامەنتى ۇجىمى» دەپ كورسەتىلگەن. بۇل تۋرالى egemen.kz ءتىلشىسى حابارلادى. ارىزدا دەپارتامەنت باسشىسى ماحامبەت ابيساتوۆتىڭ شەكتەن شىعاتىن قاتاڭ ءتارتىپ ءستيلىن تالاپ ەتەتىنى ايتىلعان. سونىڭ ىشىندە ول كەز كەلگەن جولمەن قىلمىستىڭ اشىلۋ دەڭگەيىن كوتەرۋ جونىندە قاراۋىنداعىلاردى قىسپاققا الاتىن كورىنەدى. دومالاق ارىز يەلەرى بۇعان كەلىسپەيتىنىن ايتا كەلىپ, كوپتەگەن پوليتسەيلەر قاجەتتى كورسەتكىشكە قول جەتكىزە الماعان سوڭ جاسالعان قىلمىستى امالسىزدان جاسىرۋعا ءماجبۇر ەكەنىن مالىمدەگەن. مۇنداي ءىسى ءۇشىن ولاردى پروكۋراتۋرا تاعى «تاياقتايتىنى» بەلگىلى. سونىڭ سالدارىنان ساقشىلار ءوز ەرىكتەرىمەن قىزمەتتەرىنەن كەتىپ جاتقانعا ۇقسايدى. سونىمەن بىرگە شاعىم حات يەلەرى ابيساتوۆ قىزمەتتىك قارىم-قاتىناستاردا قاراۋىنداعىلاردى ادەپ نورماسىمەن ساي كەلمەيتىن سوزدەرمەن سىبايتىنىن جازعان. ەڭ سوڭىندا ىشكى ىستەر دەپارتامەنتىندەگى ارىزدانۋشىلار ىشكى ىستەر مينيسترلىگى قالمۇحامبەت قاسىموۆتان دەپارتامەنتكە ءتيىستى تەكسەرۋ جۇرگىزىپ, ونىڭ باسشىسىنا قاجەتتى شارا قولدانۋدى وتىنگەن. ءوز كەزەگىندە وتكەن اپتادا «قازاقستان ورال» تەلەارناسىنان بەرىلگەن بريفينگ بارىسىندا باتىس قازاقستان وبلىستىق ىشكى ىستەر دەپارتامەنتى باستىعىنىڭ ءبىرىنشى ورىنباسارى ساعات ماديەۆ ەلدى شۋلاتقان دومالاق شاعىم حاتقا قاتىستى: «ىشكى ىستەر مينيسترلىگى دەپارتامەنت قىزمەتىنە كەشەندى تەكسەرۋ ءىسىن باستاپ تا كەتتى. ءبىزدىڭ جۇمىسىمىزدا قانداي دا ءبىر تەرىس ءىس-ارەكەتتىڭ بار جوعىن وسى تەكسەرۋ انىقتايتىن بولادى», – دەدى. تەمىر قۇسايىن. دەرەك: egemen.kz. سۋرەت: azh.kz.