فوتو: Depositphotos.com
اباي وبلىسىندا ارنايى الەۋمەتتىك قىزمەتتەرگە مۇقتاج بالالاردى قولداۋ ورتالىعى كامەلەتكە تولماعان تاربيەلەنۋشىنىڭ مۇددەسى ءۇشىن سوتقا تالاپ ارىز ءتۇسىردى.
سوت مالىمەتىنشە, جەتىم بالا تۇرعىن ءۇي كەزەگىندە تۇرعان. الايدا اباي وبلىسىنداعى اكىمشىلىك-اۋماقتىق وزگەرىستەردەن كەيىن جاڭا كەزەك تىزىمدەرىن قالىپتاستىرۋ بارىسىندا ول تۋرالى مالىمەتتەر جوعالىپ كەتكەن.
«جاناسەمەي اۋدانىنىڭ تكش ءبولىمى مەن سەمەي قالاسىنىڭ تۇرعىن ءۇي قاتىناستارى ءبولىمىنىڭ ماماندارى قىزمەتتىك مىندەتتەرىنە سالعىرت قاراپ, جەتىم بالانىڭ قۇقىقتارىنىڭ بۇزىلۋىنا جول بەرگەنى انىقتالدى. سوت تالاپ ارىزدى قاناعاتتاندىرىپ, لاۋازىمدى تۇلعالاردىڭ ارەكەتىن زاڭسىز دەپ تانىدى», دەلىنگەن حابارلامادا.
سوت شەشىمىمەن «وتباسى بانككە» كامەلەتكە تولماعان بالانى 2016 جىلدان باستاپ تۇرعىن ءۇي ەسەبىنە قويۋ تۋرالى جوعالعان مالىمەتتەردى قالپىنا كەلتىرۋ مىندەتتەلدى. قارجى ۇيىمى بۇل تالاپتى ءبىر اي ىشىندە ورىندادى.
