اقتوبەدە باتۋت پاركىندە سەكىرگەن بالا مۇگەدەك بولىپ قالدى

وقيعا 2024 جىلى بولعان. بالانىڭ اناسىنىڭ ايتۋىنشا, 8 جاسار ۇلى ويىن بارىسىندا باتۋتتان سەكىرىپ, اۋاسى شىعىپ كەتكەن ماتراسقا قونعان.

بالا سىنىق جاراقاتتارىمەن اۋرۋحاناعا جەتكىزىلگەن. ءبىر اپتادان كەيىن وعان وتا جاسالعانىمەن, بالانىڭ جاعدايى ناشارلاپ, 7 كۇن رەانيماتسيادا جاتقان سوڭ كوماعا تۇسكەن.

اناسىنىڭ تالاپ-ارىزى بويىنشا, ونىڭ ۇلىنىڭ سۇيەك بۋىنىنا تەمىر شتيفت بەكىتىلگەن. اۋرۋحانادان شىققاننان كەيىن 2 اي وتكەن سوڭ اۋىرسىنۋ كۇشەيگەن. تاعى ءبىر وتا جاسالعان, بىراق ول قايتادان جامباسى اۋىراتىنىن ايتقان.  بالاسىن استاناعا الىپ بارعان. انىقتالعانداي, شتيفت بۇلشىقەتتەردى جىرتىپ, سىرتقا شىعىپ كەتكەن ەكەن. دارىگەرلەر ونى الىپ تاستاپ, يليزاروۆ اپپاراتىن ورناتقان. 2025 جىلدىڭ قاڭتار ايىندا بالاعا ءۇشىنشى توپتاعى مۇگەدەكتىك بەرىلگەن.

ءبىرىنشى ساتىداعى سوت باتۋت پاركىن 2 ميلليون تەڭگە كولەمىندە مورالدىق وتەماقى تولەۋگە مىندەتتەگەن. الايدا ايەل بۇل شەشىمگە اپەللياتسيالىق شاعىم ءتۇسىردى. سوت القاسى باتۋت پاركى باسشىلىعى سەكىرۋ كەزىندە قاۋىپسىز قونۋ جاعدايىن قامتاماسىز ەتپەگەنىن راستادى. ناتيجەسىندە مەكەمە جابىرلەنۋشى تاراپقا 7 ميلليون تەڭگە تولەۋگە مىندەتتەلدى.

وقيعادان كەيىن پوليتسيا «قاۋىپسىزدىك تالاپتارىنا ساي كەلمەيتىن جۇمىستاردى ورىنداۋ» بابى بويىنشا قىلمىستىق ءىس قوزعاعان. الايدا قىلمىس بەلگىلەرىنىڭ بولماۋىنا بايلانىستى ءىس جابىلدى. تەرگەۋ بارىسىندا بالانىڭ ابايسىزدا قۇلاعانى نەمەسە قونۋ كەزىندە ەرەجەلەردى بۇزۋى مۇمكىن دەگەن قورىتىندىعا كەلگەن.