بۇل كورسەتكىش بۇرىن-سوڭدى بولماعان دەڭگەيگە جەتتى. سالىستىرۋ ءۇشىن ايتساق, 1 جەلتوقسانعا دەيىن باعدارلاما ىسكە قوسىلعاننان بەرى وسى سانات بويىنشا بار بولعانى 507 ءوتىنىم ورىندالىپ, 548 ملن تەڭگە تولەنگەن. ءوسىم قاراشا ايىندا باستالعان. ول كەزدە 236 ءوتىنىم ماقۇلدانىپ, 204 ملن تەڭگە بولىنگەن. ال 2025 جىلدىڭ باسىندا راديوحيرۋرگيا بويىنشا اي سايىنعى ورتاشا كورسەتكىش 10 وتىنىمنەن اسپاعان.
ءبىرىنشى كرەديتتىك بيۋرو بۇل جاعدايدى زەينەتاقى تولەمدەرىندەگى كەزەكتى انوماليا دەپ باعالاپ وتىر. مۇنداي كۇرت وسىمدەر قىركۇيەك ايىندا ستوماتولوگيالىق قىزمەتتەرگە تولەم جاساۋعا تىيىم سالىنعاننان كەيىن بايقالا باستاعان. شەكتەۋ كوپتەگەن جالعان قۇجاتتار انىقتالعان سوڭ ەنگىزىلگەن. بۇعان دەيىن مەديتسينالىق زەينەتاقى تولەمدەرىنىڭ نەگىزگى بولىگى ءدال وسى ستوماتولوگياعا تيەسىلى بولعان.
بۇعان دەيىن زەينەتاقى قورىنان ءتىس ەمدەۋگە 200 ملرد تەڭگە زاڭسىز شىعارىلعانىن جازعان ەدىك.
تىيىم سالىنعاننان كەيىن ازاماتتار وفتالمولوگيالىق قىزمەتتەرگە جاپپاي ءوتىنىش بەرە باستاعان. قىركۇيەك پەن قازان ايلارىندا بۇل باعىتتا دا كۇماندى بەلسەندىلىك تىركەلىپ, جەلتوقساننىڭ باسىندا كوز اۋرۋلارىن ەمدەۋگە ارنالعان وتىنىمدەر قابىلداۋ توقتاتىلدى.
قاراشا ايىندا پلاستيكالىق وپەراتسيالار بويىنشا دا وسىنداي سەرپىلىس بايقالدى. بۇل باعىتقا شەكتەۋلەر جەلتوقساننىڭ ورتاسىنان باستاپ ەنگىزىلە باستادى.
ناتيجەسىندە قازىرگى تاڭدا ەمدەلۋگە ارنالعان زەينەتاقى تولەمدەرىنىڭ نەگىزدەمەلەرى ەداۋىر قىسقاردى. پكب مالىمەتىنشە, تىزىمدە تەك تار بەيىندى ءارى اۋىر مەديتسينالىق باعىتتار عانا قالدى.
اتاپ ايتقاندا, راديوحيرۋرگيادان بولەك, ورفاندىق اۋرۋلاردى ەمدەۋ, راديونۋكليدتى جانە راديويودتەراپيا, سونداي-اق پروتوندى تەراپيا قاراستىرىلعان. جەلتوقسان ايىندا بۇل ساناتتار بويىنشا دا ءوسىم بايقالعانىمەن, ازىرگە وتىنىمدەر سانى جۇزدەپ نە مىڭداپ ەسەپتەلمەيدى.
ەسكە سالايىق, 2026 جىلى زەينەتاقى جيناعىنىڭ جەتكىلىكتى شەگى ورتا ەسەپپەن 10 پايىزعا ءوستى.
