ۋاكىل مەن ونىڭ وڭىرلەردەگى وكىلدەرى جۇرگىزگەن تەكسەرىس بارىسىندا تۇزەۋ مەكەمەلەرىندەگى قولدانىستاعى ەلەكتروندىق تەرمينالداردىڭ دۇرىس جۇمىس ىستەمەيتىنى, تەحنيكالىق تۇرعىدان ەسكىرگەنى انىقتالعان. وسىعان بايلانىستى باس پروكۋراتۋراعا ءتيىستى ۇسىنىمدار جولدانعان.
باس پروكۋراتۋرا ءوز كەزەگىندە تەرمينالداردىڭ فيزيكالىق جانە مورالدىق تۇرعىدان توزعانىن راستاپ, ولاردىڭ جۇمىسىندا جۇيەلى ماسەلەلەر بار ەكەنىن حابارلادى. قاداعالاۋ ورگانىنىڭ مالىمەتىنشە, قازىرگى ۋاقىتتا قىلمىستىق-اتقارۋ جۇيەسى مەكەمەلەرىن كەڭەيتىلگەن فۋنكتسيونالى بار زاماناۋي تەرمينالدارمەن قايتا جاراقتاندىرۋ بويىنشا پيلوتتىق جوبا جۇزەگە اسىرىلىپ جاتىر.
جاڭا تەرمينالدار ارقىلى سوتتالعاندار FaceID جۇيەسى كومەگىمەن مەملەكەتتىك ورگاندارعا وتىنىشتەر مەن ارىز-شاعىمدار جولداي الادى. سونىمەن قاتار, بەينەقوڭىراۋ ارقىلى تۋىستارىمەن بايلانىس ورناتۋ مۇمكىندىگى قاراستىرىلعان.
قازىرگى تاڭدا اتالعان زاماناۋي تەرمينال اتباسار قالاسىنداعى №1 تۇزەۋ مەكەمەسىندە سىناقتان ءوتىپ جاتىر.
