ۆەنەسۋەلا كاراكاستاعى جارىلىستاردان كەيىن اقش-تى اسكەري اگرەسسيا جاسادى دەپ ايىپتادى

بيلىك دەرەگىنشە, سوققىلار تەك استانادا عانا ەمەس, ميراندا, اراگۋا جانە لا-گۋايرا شتاتتارىندا دا تىركەلگەن. ەل پرەزيدەنتى نيكولاس مادۋرو توتەنشە جاعداي رەجيمىن جاريالاپ, قورعانىس كۇشتەرىن تولىق جاۋىنگەرلىك دايىندىققا كەلتىرۋگە بۇيرىق بەردى.

Sky News Arabia مالىمەتىنشە, كاراكاستاعى جارىلىستار جەرگىلىكتى ۋاقىتپەن تۇنگى ساعات 02:00 شاماسىندا باستالعان. الەۋمەتتىك جەلىلەردە قالا ۇستىندەگى جارقىلدار, ۇشىپ جۇرگەن تىكۇشاقتار, زىمىران اتقىلاۋلارى مەن قويۋ ءتۇتىن بەينەلەنگەن ۆيدەولار تارادى. استانانىڭ وڭتۇستىگىندە, ءىرى اسكەري بازا ماڭىندا ەلەكتر ەنەرگياسى وشكەن. ۆەنەسۋەلالىق باق كەمىندە التى-جەتى جارىلىس بولعانىن حابارلادى.

سونىمەن قاتار بۇرىنعى پرەزيدەنت ۋگو چاۆەستىڭ ماۆزولەيى ورنالاسقان كۋارتەل-دە-لا-مونتانا 4F كازارماسى اۋماعىندا دا جارىلىس بولعانى ايتىلدى. گرينۆيچ ۋاقىتىمەن 06:15-كە دەيىن جارىلىستار جالعاسقانى حابارلانعان.

وقيعاعا بايلانىستى كۋبا پرەزيدەنتى ميگەل دياس-كانەل گاۆانا ۆەنەسۋەلاعا جاسالعان سوققىلاردى ايىپتايتىنىن مالىمدەپ, حالىقارالىق قاۋىمداستىقتى اقش-تىڭ «قىلمىستىق شابۋىلىنا» جاۋاپ بەرۋگە شاقىردى.

بۇعان دەيىن اقش پرەزيدەنتى دونالد ترامپ كاراكاسقا قارسى كۇش قولدانۋ مۇمكىندىگىن بىرنەشە رەت جوققا شىعارماعان. Reuters دەرەگىنشە, ول جەكە اڭگىمەلەرىندە مادۋرودان بيلىكتەن كەتۋدى تالاپ ەتكەن. ال CBS News ءجۋرناليسى دجەننيفەر دجەيكوبستىڭ ايتۋىنشا, اسكەري سوققىلار جاساۋ تۋرالى بۇيرىقتى ترامپتىڭ ءوزى بەرگەن.

سونداي-اق The Wall Street Journal اقش بيلىگىندەگى دەرەككوزگە سىلتەمە جاساپ, ۆەنەسۋەلا اۋماعىندا امەريكالىق اسكەري وپەراتسيا ءجۇرىپ جاتقانىن حابارلادى.

قازىرگى ۋاقىتتا كاراكاستا پرەزيدەنت رەزيدەنتسياسى ماڭىنا برونەتەحنيكا تارتىلىپ, استانادان شىعاتىن جولداردا كەپتەلىس پايدا بولعان. قالا تۇرعىندارى جاپپاي كەتىپ جاتقانى حابارلانۋدا.