فوتو: istockphoto.com
ۇلتتىق ستاتيستيكا بيۋروسىنىڭ دەرەكتەرىنە سۇيەنسەك, بيىلعى جىلدىڭ ون ايىندا ەل ىشىندە 214,8 مىڭ توننا كۇنباعىس مايى وتكىزىلسە, ەكسپورتقا 523,4 مىڭ توننا ءونىم شىعارىلعان. Ranking.kz مالىمەتىنشە, وتاندىق ءونىمدى حالىقارالىق نارىقتا ىلگەرىلەتۋدەگى بەتبۇرىس 2022 جىلى باستالعان ەدى. سول تۇستا ەكسپورت كولەمى شامامەن 3 ەسە ءوسىپ, وندىرۋشىلەر قىتاي نارىعىنا جول اشتى.
سودان بەرگى سەرپىن تولاستاعان جوق: 2023 جىلى شەتەلگە ساتىلعان ءونىم 58,9%-عا, 2024 جىلى 30,6%-عا ارتتى. بيىلعى ون ايدىڭ قورىتىندىسى دا كوڭىل كونشىتەرلىك – ەكسپورتتىق جەتكىزىلىمدەر 44%-عا ۇلعايعان.
بيىلعى جىلدىڭ ون ايىندا كۇنباعىس, ماقسارى جانە ماقتا مايىن شەتەلگە ەكسپورتتاۋ ارقىلى ەل كازىناسىنا 532 ملن دوللار قۇيىلدى. ەكسپورتتىق تابىس ءبىر جىلدا 68,3%-عا وسكەن. ايتا كەتەرلىگى, ءونىمنىڭ زاتتاي كولەمى (39,9%) اقشالاي تۇسىمگە قاراعاندا باياۋ وسكەن. بۇل الەمدىك نارىقتاعى ماي قۇنىنىڭ ارتۋى تابىس ەسەلەنۋىنە سەپتىگىن تيگىزگەنىن اڭعارتادى.
وتاندىق وسىمدىك مايىنىڭ نەگىزگى تۇتىنۋشىلارى رەتىندە وزبەكستان مەن قىتاي كوش باستاپ تۇر.
وزبەكستان بيىل بۇل تاۋاردى ساتىپ الۋ كولەمىن 74,2%-عا ۇلعايتىپ, ەلىمىزگە 266,6 ملن دوللار تولەدى. بۇل وتكەن جىلدىڭ سايكەس كەزەڭىمەن سالىستىرعاندا 2 ەسە كوپ.
قىتاي ەكىنشى ءىرى ساۋدا سەرىكتەسى رەتىندە ساتۋشىلارعا 139,5 ملن دوللار ء(وسىم 28,8%) كولەمىندە تابىس اكەلدى.
