اقش سانكتسيا ءتىزىمىن نەمتسوۆتىڭ كەڭەسىمەن جاساپ تۇرعان

استانا. 23 ناۋرىز. نەمىستىڭ Frankfurter Allgemeine Sonntagszeitung گازەتى 22 ناۋرىز كۇنى ارنايى قىزمەت ورگاندارىنداعى ءوز مانبەسىنە سۇيەنە وتىرىپ, رەسەي ساياساتكەرى بوريس نەمتسوۆتىڭ ولتىرىلۋىنە قاتىستى تاعى ءبىر ۆەرسيانى العا تارتتى. بۇعان وپپوزيتسيونەردىڭ امەريكا بيلىگىمەن قويان-قولتىق جۇمىس جۇرگىزىپ كەلگەنى سەبەپ بولۋى مۇمكىن. بۇل تۋرالى نەمىستىڭ Deutsche Welle باسىلىمى حابارلادى. گازەتتىڭ مالىمەتىنە قاراعاندا, كرەملدىڭ 2014 جىلدىڭ ناۋرىزىندا قىرىمدى اننەكسيالاپ الۋىنا بايلانىستى رەسەيدىڭ بەلگىلى ساياساتكەرلەرى مەن كاسىپكەرلەرىنە قارسى سانكتسيا ءتىزىمىن دايىنداۋى بارىسىندا ۆاشينگتون ۇدايى نەمتسوۆتىڭ جەتكىزىپ تۇرعان اقپارىن پايدالانىپ وتىرعان. رەسەيدەگى وپپوزيتسيونەر ۆلاديمير ميلوۆ كىسى ءولتىرۋدىڭ مۇنداي بولجامى ءبىرشاما شىندىققا سايكەس كەلەدى دەپ ەسەپتەيدى. ونىڭ سوزىنە قاراعاندا, پۋتين مەن ونىڭ اينالاسى باسىندا اتالمىش سانكتسيالار رەسەيدىڭ قارجى سەكتورىنا مۇنشالىقتى قاتتى اسەر ەتەدى دەپ ويلاماعان. باسىلىم: «ولار سانكتسيانىڭ وسىنداي قاتقىل فورماتتا قولدانىلىپ جاتقانىنا باياعىدان نەمتسوۆتىڭ جەكە ءوزىن كىنالاپ قويعان», - دەپ, ميلوۆتىڭ سوزىنەن دايەكتەمە كەلتىرەدى. بۇدان بولەك, نەمتسوۆ اقش-تا 2012 جىلى قابىلدانعان «ماگنيتسي ءتىزىمى» دەپ اتالاتىننىڭ قالىپتاسۋ بارىسىندا دا ۆاشينگتونعا قۇراق ۇشىپ, جاردەم بەرگەن. نەمىستىڭ جوعارىداعى FAS گازەتىنىڭ اقپارىنشا, ساياساتكەر 2014 جىلى امەريكانىڭ رەسپۋبليكاشىل سەناتورلارى دجون ماككەينمەن جانە رون دجونسونمەن ارنايى كەزدەسكەن. كەزدەسۋ كەزىندە نەمتسوۆ كەڭەيتىلگەن تىزىمگە قوسۋ ءۇشىن ولارعا تاعى 12 رەسەيلىك ازاماتتىڭ اتى-ءجونىن ۇسىنادى. ولاردىڭ اراسىندا پۋتينمەن تىعىز بايلانىستا جۇرگەن كىسىلەر دە بولعان. «نەمتسوۆتىڭ تىرلىكتەرىن امەريكالىق ميللياردەر دجوردج سوروس قارجىلاندىرىپ تۇرعان», - دەپ جازادى گازەتى بۇدان ءارى. بىلايشا ايتقاندا, اتاقتى «سوروس» قورىنىڭ ەگەسى بوريس نەمتسوۆتى اقش بيىلىگى اتىنان جالداپ العان. نەمەسە ۆاشينگتونعا جالدانعان ساياساتكەردىڭ بار شىعىنىن وسى دج. سوروس اقۇيدىڭ ءوتىنىشى بويىنشا كوتەرىپ كەلگەن. مۇرات ايتقوجا.