كوللاجدى جاساعان – زاۋرەش سماعۇل ,«EQ»
بۇل – ءبىر ەلدىڭ عانا ەمەس, كۇللى ادامزات مادەنيەتىنىڭ ورتاق قازىناسىنا اينالعان ونەر يەلەرىنە كورسەتىلگەن جوعارى قۇرمەت. سەبەبى يۋنەسكو شەڭبەرىندە مەرەيتويلاردىڭ اتالىپ ءوتۋى – تۇلعانىڭ ەڭبەگى ۇلتتىق دەڭگەيدەن اسىپ, جاھاندىق ماڭىزعا يە بولعانىن بىلدىرەدى. ەرمەك سەركەباەۆ پەن ابدوللا قارساقباەۆ ءدال وسىنداي بيىككە كوتەرىلگەن, قازاق رۋحانياتىنىڭ التىن قورىنا ولشەۋسىز ۇلەس قوسقان قايراتكەرلەر.
ەرمەك بەكمۇحامەد ۇلى سەركەباەۆ – قازاقتىڭ كاسىبي ۆوكال ونەرىن الەمدىك دەڭگەيگە شىعارعان بىرەگەي داۋىس يەسى. ءانشىنىڭ باريتون ءۇنى – تەك تەحنيكالىق شەبەرلىك ەمەس, ۇلتتىڭ مىنەزىن, بولمىسىن, ىشكى جان تەبىرەنىسىن جەتكىزگەن قۇدىرەتتى داۋىس. قازاق وپەرا ونەرىندەگى اباي, قوجاعۇل, سەركە سىندى بەينەلەر ءانشى ورىنداۋىندا جاڭا كوركەمدىك بيىككە كوتەرىلدى. ول ساحنادا ءان ايتقان جوق, حالىقتىڭ تاعدىرىن, تاريحىن, ارمانىن سويلەتتى. سوندىقتان دا ەرمەك سەركەباەۆتىڭ ونەرى – ۋاقىتپەن شەكتەلمەيتىن رۋحاني مۇرا.
ال ابدوللا قارساقباەۆ – قازاق كينوسىنىڭ جۇرەگىنە اينالعان ەسىم. ونىڭ تۋىندىلارى قاراپايىمدىلىعىمەن تەرەڭ, شىنايىلىعىمەن قىمبات. اسىرەسە «مەنىڭ اتىم قوجا» ءفيلمى – بىرنەشە بۋىننىڭ ساناسىنا ساۋلە تۇسىرگەن, ادامگەرشىلىك پەن ادالدىقتى دارىپتەگەن ماڭگىلىك شىعارما. قارساقباەۆ كينو ارقىلى قازاق بالاسىنىڭ بولمىسىن, اۋىل ءومىرىنىڭ فيلوسوفياسىن, ۇلتتىق تاربيەنىڭ مايەگىن نازىك يۋمور مەن ۇلكەن جۇرەك ارقىلى كورسەتە ءبىلدى. رەجيسسەر كامەرانى تەك تەحنيكا رەتىندە ەمەس, ادام جانىنا ۇڭىلەتىن قۇرال رەتىندە قولداندى.
ال قوس تۇلعانىڭ شىعارماشىلىعىن بىرىكتىرەتىن ورتاق قاسيەت – شىنايىلىق پەن ۇلتتىق رۋحقا ادالدىق. ولار ءوز زامانىندا دا, بۇگىن دە كورەرمەن مەن تىڭدارمانىن جوعالتقان جوق. سەبەبى ناعىز ونەر ۋاقىتتان بيىك تۇرادى. توقەتەرىن تۇيگەندە, ەرمەك سەركەباەۆتىڭ ءۇنى مەن ابدوللا قارساقباەۆتىڭ كينو ءتىلى – قازاق حالقىنىڭ جان داۋىسى. سول داۋىس بۇگىندە يۋنەسكو مىنبەرىنەن ەستىلىپ, ادامزات مادەنيەتىنىڭ ورتاق اۋەنىنە اينالۋى – ۇلتىمىز ءۇشىن زور مارتەبە. بۇل مەرەيتويلار وتكەنگە تاعزىم عانا ەمەس, بولاشاققا سەنىممەن قاراۋدىڭ جارقىن نىشانى.
