اكىم بايانداماسىندا: «ۇكىمەت پەن اۋىل شارۋاشىلىعى مينيسترلىگىنىڭ قولداۋىمەن وڭىردە 13 ملرد تەڭگەگە 10 ينۆەستيتسيالىق جوبا جۇزەگە اسىرىلۋدا, وسى جوبالاردىڭ قاتارىندا شارۋاشىلىقتاردى بىرىكتىرۋ ارقىلى «وتباسىلىق فەرما» جوباسى باستالدى. اتالعان جوبا التى اۋىلدىق وكرۋگتى قامتيدى, ونىڭ اياسىندا 12 900 باس ۇساق مال, 7 800 باس ءىرى قارا مال, سونداي-اق 25 بىرلىك اۋىل شارۋاشىلىعى تەحنيكاسى مەن جابدىقتارى ساتىپ الىندى», -دەدى.
وسىنداي جوبانىڭ ءبىرى كەڭگىر اۋىلىندا جۇزەگە اسىرىلىپ جاتقان «Kengir agro» كەشەنىنىڭ قۇرىلىس الاڭىنا بارىپ, نىساننىڭ ىسكە اسۋ قارقىنىمەن تانىستىم. جوبا «وتباسىلىق فەرما» باعدارلاماسى اياسىندا جۇزەگە اسۋدا. «Kengir agro» جوباسىنىڭ نەگىزگى ماقساتى – وڭىردە سۋارمالى ەگىنشىلىكتى دامىتۋ, مال بورداقىلاۋ الاڭىن اشۋ جانە الداعى ەكى جىلدا ءسۇت فەرماسىن سالۋ. گەكتار كولەمى 901- ءدى قۇرايدى. قازىردىڭ وزىندە 500 گەكتار اۋماقتا تامشىلاتىپ سۋارۋعا ارنالعان جەر دايىندالىپ, قاجەتتى قۇرىلعىلار جەتكىزىلگەن. جەم-ءشوپ دايىنداۋ جۇمىستارى باستالعان.
بۇل – سوڭعى وتىز جىلدىقتا ۇلىتاۋ وڭىرىندە بولماعان جوبا. تامشىلاتىپ سۋارۋ ادىسىمەن اتالعان اۋماققا مال ازىعى, جەم-ءشوپ وسىرىلەدى. قاجەتتى قوردى دايىنداعان سوڭ 500-گە جۋىق اسىل تۇقىمدى ءىرى قارا سيىر اكەلىپ, بورداقىلانادى. ناتيجەسىندە الداعى ەكى جىلدا ءسۇت ونىمدەرىن دايىندايتىن فەرما پايدا بولادى.
قازىرگى تاڭدا كەشەن اۋماعىندا اكىمشىلىك-شارۋاشىلىق عيمارات, جاتاقحانا, اسحانا, مال بورداقىلاۋ الاڭى, قورا-جايلار مەن قويما سالىنىپ جاتىر. قۇرىلىسقا وبلىس اۋماعىندا وندىرىلەتىن وتاندىق قۇرىلىس ماتەريالدارى پايدالانۋدا. قۇرىلىس باسىندا جۇرگەن جۇمىسشىلاردىڭ جاعدايىن بىلمەك ويمەن سوزگە تارتتىم.
«قىزىلوردا وبلىسىنىڭ شيەلى اۋدانىنان كەلدىم. كەلىسىم-شارتپەن جۇمىس ىستەپ جاتىرمىن. كەلگەنىمە جارتى اي بولدى. اركىم ءوز ماماندىعىنا ساي جۇمىستارىن اتقارىپ جاتىر. مەن دانەكەرلەۋشىمىن. جالاقىم 400-450 مىڭ تەڭگە. باسپانا بەرگەن. ازىق-ت ۇلىكپەن قامتاماسىز ەتەدى. قالاساق جەكسەنبى كۇنى دە جۇمىس ىستەي بەرەمىز» دەيدى زينابدين رايىمجانوۆ.
سابىر يۋلداشەۆ بولسا «وزبەكستاننان كەلىپ جۇمىس ىستەگەنىنە ەكى جارىم اي بولدى. سىلاقشىمىن. جالاقىمدى ۋاقىتىندا الامىن», - دەپ جاساپ جاتقان جۇمىسىنا كوڭىلى تولاتىنىن جەتكىزدى.
اتالعان جوبا ىسكە قوسىلسا ءوڭىردىڭ اگرارلىق مۇمكىندىگى كەڭەيىپ, جەرگىلىكتى شارۋاشىلىقتاردىڭ وندىرىستىك قۋاتى ارتا تۇسپەك.
«قاراعاندى قالاسىنا بارا جاتقان جولدا تەرەكتى, تۇيەمويناق, 366 جانە 60 رازەزد ستانتسيالار كەڭگىر اۋىلىنا قارايدى. سوسىن جوشىحانعا بارا جاتقاندا قورعانباي اۋىلى بار. وسىنداعى تۇرعىنداردىڭ بارلىعى مال شارۋاشىلىعىمەن اينالىسادى. جالپى وكرۋگ بويىنشا بىزدە 85 شارۋا قوجالىعى يەسى تىركەلگەن. ماقساتىمىز «اق باس» جالعا بەرىلەتىن تۇقىمدى ءىرى-قارا مالىن ۇلعايتۋ. ايماقتا ەت وندەيتىن كومبينات جوق. جۇرتتار وزدەرى باققان مالدارىن اكەلىپ, ساتادى. سەنبى سايىن قالادا جارمەڭكە وتەدى. ەتىن, جۇمىرتقاسىن ساتامىن دەگەن كىسىلەرگە سول جارمەڭكەدە تەگىن ورىن بەرەمىز» -دەيدى اۋىل اكىمى رۇستەم شاحمۇران ۇلى.
جەرگىلىكتى تۇرعىندار قاراپ وتىرعان جوق, تەلەفوندا WhatsAp ارقىلى توپ اشىپ نەمەسە الەۋمەتتىك جەلى ارقىلى بورداقىلاعان مالىن ساۋدالاي بەرەدى. اۋىلدىڭ ىشىندە ءۇش شاعىن دۇكەن جانە «جانۇيا» گيپەرماركەت بار. جەزقازعان قالاسىنداعى SAMADI گيپەرماركەتىندە كەڭگىر اۋىلىنىڭ ازىق-ت ۇلىك ءونىمىن ساتاتىن ورىنى بار. اۋىل تۇرعىندارى دۇكەندەرگە ءتۇشپارا, باۋىرساق, قۇرت قايماق, ايران سياقتى ءوز ونىمدەرىن اكەلىپ, ساۋدالايدى.
قالا ماڭىنداعى اتالمىش اۋىل مال شارۋاششىلىعىمەن قاتار قۇس شارۋاشىلىعىمەن اينالىسادى. مۇندا ەرتەدەن كەلە جاتقان «پلەمپتيتسەتورگ» جشس قۇس فابريكاسىنىڭ فيليالى بار. ونى ستانيسلاۆ بەلوگۋزوۆ باسقارادى. بۇل فابريكا قۇس ەتى, جۇمىرتقامەن جەزقازعان, ساتباەۆ قالالارىن قامتاماسىز ەتەدى. اۋىل تۇرعىندارىنىڭ سەكسەن پايىزى وسىندا جۇمىس ىستەيدى.
سونىمەن قاتار جەكە كاسىپكەر رينات احتياموۆ جەتەكشىلىك ەتەتىن « ۇلىتاۋ قۇس» كاسىپورىن قۇس شارۋاشىلىعىمەن اينالىسادى. كاسىپكەر مەملەكەتتىك قولداۋعا يە بولىپ, قۇس ءوسىرىپ, ەتىن وڭدەيتىن, سوياتىن تسەح اشتى. دۇكەندەردە ءوز ونىمدەرىن قولجەتىمدى باعامەن ساتىپ جاتىر.
اۋىل شارۋاشىلىعىن دامىتاتىن وسىنداي كەشەندەر ۇلىتاۋ وبلىسىنىڭ ەكونوميكالىق الەۋەتىن ارتتىرادى.
ۇلىتاۋ وبلىسى
