اقش-تا بيزنەستىڭ 39%-ى ايەلدەرگە تيەسىلى. 24.kz جازۋىنشا, ەلدە شامامەن 14 ميلليون كاسىپورىن ايەلدەرگە قارايدى. مۇنداي دەرەكتەر Wells Fargo كومپانياسىنىڭ 2024 جىلعى «ايەلدەردىڭ بيزنەسكە ىقپالى» اتتى ەسەبىندە كەلتىرىلگەن.
ساراپشىلاردىڭ باعالاۋىنشا, بۇل كورسەتكىش التى جىل بۇرىنعى دەڭگەيدەن 13%-عا جوعارى. ءوسىم ەرلەر مەن ايەلدەردىڭ ەڭبەك نارىعىنا قاتىسۋ دەڭگەيى اراسىنداعى الشاقتىقتىڭ بىرتىندەپ ازايۋىمەن بايلانىستى. اقش ەڭبەك ستاتيستيكاسى بيۋروسىنىڭ مالىمەتىنە سايكەس, بۇگىندە ايەلدەر ەلدىڭ ەكونوميكالىق بەلسەندى حالقىنىڭ جارتىسىنا جۋىعىن قۇرايدى.
سقو-داعى شاعىن جانە ورتا بيزنەستىڭ جارتىسىنا جۋىعىن ايەلدەر باسقارادى
ءوز ءىسىن اشقان كاسىپكەر ايەلدەر قوسىمشا قارجىلىق رەسۋرستارعا, سونىڭ ىشىندە مەملەكەتتىك كەپىلدىكپەن بەرىلەتىن نەسيەلەرگە قول جەتكىزە الادى. مۇنداي نەسيەلەردىڭ شامامەن 36%-ى ايەلدەرگە تيەسىلى كومپانيالارعا بەرىلەدى. Forbes دەرەگىنشە, نەسيەنىڭ ەڭ جوعارى سوماسى 5,5 ميلليون اقش دوللارىنا دەيىن جەتىپ, مەرزىمى 5 جىلدان 25 جىلعا دەيىنگى ارالىقتى قامتيدى.
سونىمەن قاتار ەلدە Women’s Business Centers جانە National Association of Women Business Owners سەكىلدى ۇيىمدار جۇمىس ىستەيدى. مەملەكەتتىڭ قاتىسۋىمەن قۇرىلعان بۇل قۇرىلىمدار كەڭەس بەرىپ, وقىتۋ جۇرگىزىپ, ايەلدەرگە كاسىپكەرلىك جولىنداعى العاشقى قادامدارىن جاساۋعا كومەكتەسەدى.
