اتالعان كەزەڭدە عىلىم جانە جوعارى ءبىلىم مينيسترلىگى باسشىلىعى بۇقارالىق اقپارات قۇرالدارىنىڭ وكىلدەرىمەن بىرقاتار كەزدەسۋلەر وتكىزدى. سولاردىڭ بىرىندە عىلىم جانە جوعارى ءبىلىم ۆيتسە-ءمينيسترى گۇلزات كوبەنوۆا 2025-2026 وقۋ جىلىنا كادر دايارلاۋعا بولىنگەن مەملەكەتتىك ءبىلىم گرانتتارى تۋرالى مالىمەت بەردى.
ۆەدومستۆو دەرەگىنشە, الداعى وقۋ جىلىنا بارلىعى 93 232 ءبىلىم گرانتى بولىنگەن. ونىڭ ىشىندە 77 084 گرانت باكالاۆرياتقا, 13 229 گرانت ماگيستراتۋراعا جانە 2 919 گرانت دوكتورانتۋراعا قاراستىرىلعان.
جوعارى ءبىلىمنىڭ قولجەتىمدىلىگىن ارتتىرۋ ماقساتىندا مەملەكەت, قوعامدىق قورلار, اتا-انالار مەن بانكتەردىڭ قاتىسۋىمەن «كەلەشەك» بىرىڭعاي جيناقتاۋ جۇيەسى ەنگىزىلگەن. بۇل جۇيە 5 جاستان باستاپ ءبىلىم بەرۋ كاپيتالىن قالىپتاستىرۋدى كوزدەيدى. مەملەكەت تاراپىنان 60 ايلىق ەسەپتىك كورسەتكىش مولشەرىندە بىرجولعى باستاپقى كاپيتال بەرۋ قاراستىرىلعان. جيناقتالعان قاراجاتتى بولاشاقتا جوعارى ءبىلىم الۋعا نەمەسە تۇرعىن ءۇي جاعدايىن جاقسارتۋعا باعىتتاۋعا مۇمكىندىك بار. قازىرگى تاڭدا جۇيە اياسىندا 133,9 مىڭعا جۋىق سالىم ەسەپشوتى اشىلعان.
سونىمەن قاتار باكالاۆريات ستۋدەنتتەرىنە ارنالعان شاكىرتاقى مولشەرى سوڭعى جىلدارى ەداۋىر ارتقان. اتاپ ايتقاندا, 2025 جىلى شاكىرتاقى 52 372 تەڭگەنى, ال پەداگوگيكالىق ماماندىقتار بويىنشا 84 000 تەڭگەنى قۇرادى. بۇل كورسەتكىش 2020 جىلمەن سالىستىرعاندا ەكى ەسەدەن استام ءوسىمدى كورسەتەدى.
ايتا كەتەيىك, قابىلدانىپ جاتقان شارالار مەملەكەت باسشىسىنىڭ عىلىم مەن جوعارى ءبىلىم سالاسىن دامىتۋ, كادر الەۋەتىن كۇشەيتۋ جانە جاستارعا تەڭ مۇمكىندىك جاساۋ جونىندەگى تاپسىرمالارىن جۇيەلى تۇردە ىسكە اسىرۋعا باعىتتالعان.
