فوتو: narkesken.kz
ماراپاتتاۋ ءىس-شاراسىنا مينيسترلىك اپپاراتىنىڭ باسشىسى بولات توكەجانوۆ قاتىسىپ, جەدەل جاردەم فەلدشەرلەرىنە جانقيارلىق ەڭبەگى, ەرلىگى مەن ماماندىققا ادالدىعى ءۇشىن العىسىن ءبىلدىردى.
«بۇگىن ءبىز مەديتسينانىڭ الدىڭعى شەبىندە ەڭبەك ەتىپ, ساناۋلى مينۋتتار ىشىندە شەشىم قابىلداپ, توتەنشە جاعدايلاردا ادام ءومىرىن ساقتاپ قالاتىن جەدەل جاردەم فەلدشەرلەرىنە قۇرمەت كورسەتۋ ءۇشىن جينالدىق. بۇل – جاي عانا ماراپاتتاۋ ءراسىمى ەمەس, تەرەڭ العىس پەن قوعامدىق مويىنداۋدىڭ كورىنىسى», دەدى دەنساۋلىق ساقتاۋ مينيسترلىگىنىڭ اپپارات باسشىسى بولات توكەجانوۆ.
دەنساۋلىق ساقتاۋ مينيسترلىگىنىڭ بۇيرىعىنا سايكەس 24 فەلدشەرگە ۆەدومستۆولىق ناگرادا تابىستالدى.
اتاپ ايتقاندا, 4 فەلدشەر «دەنساۋلىق ساقتاۋ ءىسىنىڭ ۇزدىگى» توسبەلگىسىن, 11 فەلدشەر «دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن» بەلگىسىن (ونىڭ ىشىندە بىرەۋى قايتىس بولعاننان كەيىن) يەلەندى. ال 9 فەلدشەر قۇرمەت گراموتاسىمەن ماراپاتتالدى.
ايتا كەتەيىك, بۇعان دەيىن ەلوردادا فەلدشەر ۇلدانا مىرزۋانعا ارنالعان ەسكەرتكىش تاقتا ورناتىلعان ەدى.
سونداي-اق استانادا مەديتسينالىق كوللەدجدەگى دارىسحاناعا ۇلدانا مىرزۋاننىڭ ەسىمى بەرىلەتىنى حابارلانعان.
