فوتو: سۋ رەسۋرستارى جانە يرريگاتسيا مينيسترلىگى
مويىنقۇم اۋدانىندا مينيستر فۋرمانوۆ گيدروتورابىنداعى جوندەۋ جۇمىستارىمەن تانىستى. شۋ وزەنىندە ورنالاسقان بۇل نىسان تۇركىستان وبلىسىنىڭ سوزاق اۋدانىنا ەكولوگيالىق ماقساتتا سۋ جىبەرۋگە ارنالعان. بىلتىر گيدروتوراپتا سەگمەنتتى قاقپا اۋىستىرىلعان.
اتالعان اۋداننىڭ قارابوگەت اۋىلىندا ن.نۇرجىگىتوۆ ەلدىمەكەنگە اپاراتىن كىرەبەرىس اۆتوجولداعى كوپىردىڭ قۇرىلىس بارىسىن تەكسەردى. ۇزىندىعى 78,3 مەتردى قۇرايتىن بۇل نىسان شۋ وزەنىنىڭ ارناسى ارقىلى قاۋىپسىز ءارى جىلدام قاتىناستى قامتاماسىز ەتۋگە مۇمكىندىك بەرەدى.
سونداي-اق مينيستر ۇزىندىعى 120 شاقىرىم, ەنى 30-40 مەتر بولاتىن فۋرمانوۆ اينالما كانالىندا 40 جىلدا العاش رەت جۇرگىزىلگەن مەحانيكالىق تازالاۋ جۇمىستارىنىڭ ناتيجەلەرىمەن تانىستى. بۇل جۇمىستار بيىل شىلدە ايىندا باستالىپ, 25 جەلتوقساندا اياقتالدى. تازالاۋ جۇمىستارىنا 9 شىنجىرتاباندى ەكسكاۆاتور جانە 2 تيەگىش تەحنيكا جۇمىلدىرىلدى.
مەحانيكالىق تازالاۋ قىلىشباي, قۇموزەك, قارابوگەت, سارىوزەك اتتى ءتورت ەلدى مەكەننىڭ بويىمەن وتەتىن كانالدىڭ سۋ وتكىزۋ قۋاتىن ارتتىرۋعا مۇمكىندىك بەرەدى. ناتيجەسىندە تۇركىستان وبلىسىنىڭ سوزاق اۋدانىنا سۋ جىبەرۋ تيىمدىلىگى ارتادى. ەسكە سالايىق, وتكەن ۆەگەتاتسياارالىق كەزەڭدە ەكولوگيالىق ماقساتتا سوزاق اۋدانىنا شۋ وزەنىنەن 1,5 ملرد تەكشە مەتر سۋ جىبەرىلگەن.
قازىرگى ۋاقىتتا مويىنقۇم اۋدانىندا شۋ وزەنىندە رەتتەۋشى گيدروتەحنيكالىق قۇرىلىس سالۋ جانە وزەن ءتۇبىن تازالاۋ جوباسى ازىرلەنىپ جاتىر.
شۋ اۋدانىندا مينيستر يرريگاتسيا جانە درەناج جۇيەلەرىن جەتىلدىرۋ جوباسىنىڭ ەكىنشى كەزەڭى شەڭبەرىندە اتقارىلعان جۇمىستاردىڭ ناتيجەلەرىمەن تانىستى. بيىل جالپى ۇزىندىعى 69,7 شاقىرىمدى قۇرايتىن 15 كانالدى رەكونسترۋكتسيالاۋ جۇمىستارى اياقتالىپ, ولاردىڭ بويىنا 240 گيدروتەحنيكالىق قۇرىلىس ورناتىلدى. سونىمەن قاتار 55 باقىلاۋ ۇڭعىماسى بۇرعىلاندى. قازىرگى ۋاقىتتا نىسانداردى پايدالانۋعا بەرۋ جۇمىستارى جۇرگىزىلىپ جاتىر.
«كەلەسى جىلعا جاسالعان بولجامداردى ەسكەرە وتىرىپ, وبلىستاعى سۋ شارۋاشىلىعى نىساندارىنىڭ بارىنشا دايىندىعى مەن ءتيىمدى جۇمىس ىستەۋىن قامتاماسىز ەتۋ قاجەت. قازىرگى جاعدايدا سۋارۋ ماقساتىندا بولسىن نەمەسە تابيعاتتى قورعاۋ ءۇشىن جۇرگىزىلەتىن سۋ جىبەرۋلەر بولسىن, سۋدى ءدال ءارى ءادىل ءبولۋ بۇرىنعىدان دا ماڭىزدى بولىپ وتىر. سوندىقتان جۇرگىزىلىپ جاتقان بارلىق قۇرىلىس-مونتاجداۋ جانە تازالاۋ جۇمىسىن ۋاقىتىلى اياقتاۋ قاجەت», دەدى ن.نۇرجىگىتوۆ.
