فۋتبول كلۋبىنىڭ ءباسپاسوز قىزمەتى جەرگىلىكتى كوماندانىڭ ەكى لەگيونەرمەن قوشتاساتىنىن مالىمدەدى.
ەكى لەگيونەردىڭ ءبىرى – جوەل نگاندۋ كايامبا. كونگو دەموكراتيالىق رەسپۋبليكاسىنىڭ فۋتبولشىسى جارتىلاي قورعاۋشى پوزيتسياسىندا وينادى.
ول قازاقستانداعى ەڭ كوپ دريبلينگ اۆتورىنىڭ ءبىرى رەتىندە تانىمال بولعان ەدى. فۋتبولداعى مانسابىن ءوز ەلىندەگى «شاركس» كومانداسىندا باستاعان. كەيىننەن چەحيانىڭ «گلينسكو», «پرشيبرام» جانە «ۆيكتوريا» (پلزەن) كلۋبتارىندا دوپ تەپتى. بۇدان سوڭ تۇركيانىڭ «سامسۋنسپور» مەن «بولۋسپور» كلۋبىندا ويناپ, بىلتىرعى ماۋسىمدى «اتىراۋدا» وتكىزدى.
جوەل نگاندۋ كايامبا بيىل ليۆيالىق ء«ابۋ ءساليم» كلۋبىندا وينادى. ال ماۋسىم ايىندا «اتىراۋ» فۋتبول كلۋبىنا قايتا ورالىپ, ءۇش ويىنعا قاتىستى.
ەكىنشى لەگيونەر – گانا ەلىنىڭ فۋبولشىسى ابدۋل راشيد ابۋباكار. جەرگىلىكتى كوماندا قۇرامىنا بيىلعى جازدا «ورداباسى» كلۋبىنان اۋىسىپ, الاڭعا سەگىز رەت شىقتى. 
«لەگيونەرلەر «اتىراۋ» فۋتبول كلۋبىمەن كەلىسىمشارتتىڭ اياقتالۋىنا بايلانىستى قوشتاسادى. قازىر كلۋب بارلىق ويىنشى, ونىڭ ىشىندە لەگيونەر فۋتبولشىلار الدىنداعى قارجىلىق مىندەتتەمەلەرىن تولىق ورىندادى. «اتىراۋ» فۋتبول كلۋبىندا جالاقى قارىزى جوق», دەپ حابارلادى كلۋبتىڭ ءباسپاسوز قىزمەتى.
