اقتاۋ قالالىق اكىمدىگى بۇل جاعدايدان حاباردار بولىپ شىقتى. 29-شاعىن اۋدان 23 تۇرعىن ۇيدە جىلۋ تاسىمالداعىشتىڭ تەمپەراتۋرالىق پارامەترلەرىنىڭ تالاپقا ساي كەلمەۋىنەن پاتەرلەر جىلىماي تۇرعان كورىنەدى.
«بۇل جاعداي شاعىن اۋداننىڭ جىلۋ جەلىلەرىندەگى گيدراۆليكالىق تەڭگەرىمنىڭ بۇزىلۋىنان بولىپ تۇر. وعان قوسا, باسقا عيماراتتاردا قۋاتتى سورعىلار پايدالانىلادى. ال, اتالعان ءۇيدىڭ ەلەۆاتورلىق جىلىتۋ جۇيەسى ەسكىرگەن. مۇنداي ماسەلەلەردى شەشۋ ءۇشىن قالادا جىلۋ توراپتارىن جاڭعىرتۋ باعدارلاماسى جۇزەگە اسىرىلىپ جاتىر. 26, 27, 28, 28ا جانە 29-شاعىن اۋدانداردا ەسكى جۇيەلەر كەزەڭ-كەزەڭىمەن اۆتوماتتاندىرىلعان جۇيەلەرگە اۋىستىرىلادى. اتالعان 23 ۇيدە دە زاماناۋي اۆتوماتتاندىرىلعان جىلۋ تورابىن ورناتۋ جوسپارلانعان», دەلىنگەن حابارلامادا.
اكىمدىكتىڭ مالىمەتىنشە, مەردىگەر مەكەمە اتالعان تۇرعىن ۇيدە جىلىتۋ جۇيەسىن رەتتەۋ جانە تۇراقتاندىرۋ جۇمىستارىن باستاعان. 27 جەلتوقسانعا دەيىن ماسەلەنى تولىق شەشۋ جوسپارلانىپ وتىر.
