فوتو: gov.kz
2025 جىلدىڭ 11 ايىندا بجزق-دان بارلىق تولەمدەر مەن اۋدارىمدار كولەمى 1 697,09 ملرد تەڭگەنى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 50,5%-عا كوپ. جىل باسىنان بەرى تۇرعىن ءۇي جاعدايلارىن جاقسارتۋعا جانە ەمدەلۋگە ارنالعان بىرجولعى زەينەتاقى تولەمدەرى (بزت) دە جۇزەگە اسىرىلدى – 1 009,68 ملرد تەڭگە, مۇراگەرلىك بويىنشا 56,59 ملرد تەڭگە, قر-دان تىس جەرگە تۇراقتى تۇرۋعا كەتۋگە بايلانىستى 40,34 ملرد تەڭگە, مۇگەدەكتىگى بار ادامدارعا – 2,85 ملرد تەڭگە, جەرلەۋگە – 9,65 ملرد تەڭگە كولەمىندە تولەم جاسالدى. ساقتاندىرۋ ۇيىمدارىنا 356,43 ملرد تەڭگە اۋدارىلدى.
جالپى العاندا, 2025 جىلعى 1 جەلتوقساندا قازاقستان ازاماتتارىنىڭ زەينەتاقى جيناقتارى 25,82 ترلن تەڭگەنى قۇراپ, ءبىر جىل ىشىندە 3,72 ترلن تەڭگەگە نەمەسە 16,8%-عا ءوستى.
مىندەتتى زەينەتاقى جارنالارى (مزج) ەسەبىنەن جيناقتار 24,39 ترلن تەڭگەدەن استى, بۇل 12 اي ىشىندە 14,9%-عا وسكەنىن بىلدىرەدى. مىندەتتى كاسىپتىك زەينەتاقى جارنالارى (مكزج) بويىنشا جيناقتار 724,44 ملرد تەڭگەنى قۇراپ, جىلدىق ءوسىم 12,7% بولدى. ەڭ جوعارى جىلدىق ءوسىم ەرىكتى زەينەتاقى جارنالارى (ەزج) بويىنشا بايقالدى – 26,3%, ولاردىڭ كولەمى 1 جەلتوقساندا 9,58 ملرد تەڭگەنى قۇرادى.
جۇمىس بەرۋشى مىندەتتى زەينەتاقى جارنالارى (مزج) 2024 جىلعى 1 قاڭتاردان باستاپ سالىمشىلاردىڭ زەينەتاقى شوتتارىنا ءتۇستى, جالپى كولەمى 691,53 ملرد تەڭگە بولدى. بيىل جەكە جانە شارتتى زەينەتاقى شوتتارىنا 3 085,73 ملرد تەڭگە جارنا ءتۇستى, بۇل وتكەن جىلدىڭ وسى كەزەڭىمەن سالىستىرعاندا 19,2% (نەمەسە 496,50 ملرد تەڭگە) ارتىق.
جەكە زەينەتاقى شوتتارىنا (جزش) مزج ەسەبىنەن قاڭتار-قاراشا ارالىعىندا 2 379,91 ملرد تەڭگە ءتۇستى (وتكەن جىلدىڭ وسى كەزەڭىمەن سالىستىرعاندا 9,0%-عا ءوستى), مكزج – 122,12 ملرد تەڭگە (17,1% ءوسىم), ەزج – 2,15 ملرد تەڭگە. مزج بويىنشا جارنالار – 405,17 ملرد تەڭگە.
1 جەلتوقسانداعى بجزق-داعى جالپى زەينەتاقى شوتتارىنىڭ سانى 18,15 ملن بىرلىكتى قۇرادى, بۇل وتكەن جىلمەن سالىستىرعاندا 1,09 ملن بىرلىككە نەمەسە 6,4%-عا وسكەن. ونىڭ ىشىندە جزش سانى 12,70 ملن بىرلىك, ونىڭ ىشىندە مزج بويىنشا – 11,28 ملن, مكزج بويىنشا – 760,24 مىڭ, ەزج بويىنشا – 464,22 مىڭ بىرلىك. مزج ەسەبىنەن شارتتى زەينەتاقى شوتتارى 5,45 ملن بىرلىكتى قۇرادى.
ەسكە سالساق, 2026 جىلدان باستاپ زەينەتاقى ارتىقشىلىقتارىن الۋ شەكتەرىندە وزگەرىستەر بولادى. بۇعان دەيىن حابارلانعانداي, بيىلعى 4 جەلتوقساننان باستاپ زەينەتاقى ارتىقشىلىقتارىن وفتالمولوگيالىق ەمدەۋگە پايدالانۋ مۇمكىن بولمايدى. 2025 جىلعى 15 قىركۇيەكتەن باستاپ ءتىس ەمدەۋگە ارنالعان زەينەتاقى جيناقتارىن پايدالانۋ بويىنشا وتىنىشتەر قابىلداۋ توقتاتىلعان ەدى. 9 جەلتوقساننان باستاپ زەينەتاقى جيناقتارى ارقىلى جاسالاتىن پلاستيكالىق وتاعا دا تىيىم سالىندى.
