فوتو: اشىق دەرەككوز
قاراعاندى وبلىسىنىڭ اكىمى ەرماعانبەت بولەكپاەۆ «Saryarqa» تەلەارناسىنا بەرگەن سۇحباتىندا وڭىردەگى ءتۋريزمدى دامىتۋ جوسپارلارىن ءبولىستى. اكىمنىڭ ايتۋىنشا, بالقاش اۋەجايىن جاڭارتۋ جۇمىستارى اياقتالۋعا جاقىن. 1967 جىلى سالىنعان جانە سوڭعى رەت 2007 جىلى جوندەلگەن بۇل نىساندى مودەرنيزاتسيالاۋعا ارناۋلى مەملەكەتتىك قوردان 945 ملن تەڭگە بولىنگەن.
«قازىر بالقاش بويىنشا وتە اۋقىمدى جۇمىستار اتقارىلىپ جاتىر. بۇل تۇتاس كەشەندى باعدارلاما. اۋەجايدى رەكونسترۋكتسيالاۋ جۇمىستارى اياقتالۋعا جاقىن, كەلەسى جىلدان باستاپ ول تولىق كۇشىندە جۇمىس ىستەپ, كۇن سايىن 8-9 بورتتى قابىلدايدى. سونىمەن قاتار قالا جاعالاۋىن اباتتاندىرىپ, جاعاجاي ايماقتارىنا ينفراقۇرىلىم تارتىپ جاتىرمىز. تورانعالىققا بۇرىن-سوڭدى بولماعان اۋىز سۋ جەتكىزىپ, كارىز جۇيەسىن ورناتامىز», دەدى ايماق باسشىسى.
مودەرنيزاتسيا تولىق اياقتالعاننان كەيىن بالقاشتان شىمكەنت, جەزقازعان جانە تۇركىستان قالالارىنا جاڭا باعىتتار اشىلىپ, ۇشۋ گەوگرافياسى كەڭەيتىلمەك. بۇل شارالار دەمالۋشىلار اعىنىن ايتارلىقتاي ارتتىرۋعا ءتيىس.
سونىمەن قاتار بالقاش ءوڭىرىن دامىتۋدىڭ كەشەندى باعدارلاماسى اياسىندا قالا جاعالاۋىن اباتتاندىرۋ, جاعاجاي ايماقتارىنا ينجەنەرلىك ينفراقۇرىلىم تارتۋ جۇمىستارى ءجۇرىپ جاتىر. جاڭا دەمالىس ورىندارىن سالۋ ءۇشىن بارلىق كوممۋنيكاتسياسى بار جەر تەلىمدەرىنە اۋكتسيوندار وتكىزىلىپ جاتىر.
وبلىس باسشىسى قارقارالى اۋدانىنداعى ءتۋريزمنىڭ جاي-كۇيىنە دە توقتالدى. ونداعى 75 گەكتار اۋماقتى الىپ جاتقان «بۇعىلى» دەمالىس ايماعى جىل بويى جۇمىس ىستەيتىن بولادى. بيىل قاراعاندى – قارقارالى تاسجولى تولىق جوندەۋدەن وتسە, كەلەر جىلى قارقارالى قالاسىنىڭ ىشكى جولدارى جاڭارتىلماق.
