ىشكى جالپى ونىمدەگى ورتا بيزنەستىڭ ۇلەسى قانداي؟

ءماجىلىس دەپۋتاتى ولجاس نۇرالدينوۆتىڭ ايتۋىنشا, سوڭعى 10 جىلدا كاسىپكەرلەردى قولداۋعا تريلليونداعان تەڭگە بولىنگەنىنە قاراماستان, ورتا بيزنەستىڭ ىشكى جالپى ونىمگە ء(ىجو) قوسقان ۇلەسى ءالى دە تومەن دەڭگەيدە قالىپ وتىر.

دەپۋتاتتىڭ مالىمەتىنشە, قازىرگى تاڭدا ورتا بيزنەستىڭ ءىجو-دەگى ۇلەسى نەبارى 5-7 پايىزدى قۇرايدى. ال قازاقستاننىڭ 2029 جىلعا دەيىنگى ۇلتتىق دامۋ جوسپارىنا سايكەس, بۇل كورسەتكىش 15 پايىزعا جەتۋى ءتيىس.

«قازىرگى ديناميكامەن بۇل ماقساتقا قول جەتكىزە الامىز با؟ مەملەكەتتىك قولداۋ كورسەتۋ كەزىندە جانە مەملەكەتتىك ستاتيستيكانى قالىپتاستىرۋ بارىسىندا بيزنەس سۋبەكتىلەرىنە ءارتۇرلى ولشەمدەر قولدانىلادى. ءبىرى ورتا بيزنەس دەپ سانالسا, ەكىنشىسىندە ول شاعىن نەمەسە ءىرى بيزنەس رەتىندە كورسەتىلۋى مۇمكىن. مۇنداي جاعدايدا ناقتى قانداي كريتەريلەرگە سۇيەنۋىمىز كەرەك؟» دەپ سۇراق قويدى و.نۇرالدينوۆ.

پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ورتا بيزنەستىڭ ءىجو-دەگى ۇلەسى شامامەن 7 پايىز ەكەنىن جانە بۇل كورسەتكىش بىرنەشە جىلدان بەرى وزگەرمەي تۇرعانىن ايتتى.

ءمينيستردىڭ سوزىنشە, ەلىمىزدە ورتا بيزنەس سۋبەكتىلەرىنىڭ سانى شامامەن 3 مىڭعا جۋىق. مەملەكەت تاراپىنان وتاندىق وندىرۋشىلەرگە قولداۋ كورسەتىلىپ وتىر, الايدا بيزنەستى ۇساقتاندىرۋ ءۇردىسى ولاردىڭ ساندىق وسىمىنە كەدەرگى كەلتىرەدى.

«جاڭا سالىق كودەكسى وسى ماسەلەلەردىڭ شەشىمىن بەرەدى جانە بيزنەستىڭ ۇساقتانۋىن تەجەۋگە ىقپال ەتەدى. قازىرگى تاڭدا ءوزىن-ءوزى جۇمىسپەن قامتىعان كاسىپكەرلەرگە جانە جەڭىلدەتىلگەن سالىق رەجيمىندەگى بيزنەسكە ارنالعان ارنايى رەجيمدەر بار. دەگەنمەن, ورتا بيزنەس دەڭگەيىنە وتكەننەن كەيىن سالىقتىق جۇكتەمە ارتادى, ونى كاسىپكەر تولەۋى ءتيىس», دەدى سەرىك جۇمانعارين.

سونىمەن قاتار مينيستر بيزنەستى قولداۋعا باعىتتالعان «ورلەۋ» باعدارلاماسى بار ەكەنىن, سونداي-اق ەكى كەپىلدىك قورى قۇرىلعانىن اتاپ ءوتتى. ونىڭ ءبىرى شاعىن جانە ورتا بيزنەسكە, ەكىنشىسى ورتا جانە ءىرى بيزنەسكە ارنالعان. بۇل شارالار 2029 جىلعا دەيىن ورتا بيزنەستىڭ دامۋىنا سەرپىن بەرەدى دەپ كۇتىلەدى.

ال ستاتيستيكا ماسەلەسىنە قاتىستى مينيستر بۇل باعىتتا ساقتىق قاجەت ەكەنىن ايتتى.

«ستاتيستيكا بولەك, بيزنەستى قولداۋ مەن سالىق ساياساتى بولەك جۇرگىزىلەدى. ەگەر قازىر جىكتەۋگە تۇبەگەيلى وزگەرىس ەنگىزسەك, ءىرى بيزنەس ورتا بيزنەسكە اينالىپ كەتۋى مۇمكىن. بۇل ورتا بيزنەستىڭ سانىن ارتتىرعانىمەن, رەسپۋبليكالىق بيۋدجەت كىرىستەرىنە كەرى اسەر ەتەدى. سوندىقتان بۇل ماسەلە باقىلاۋدا, بىراق ونى ءبىر جىلدا شەشۋ مۇمكىن ەمەس. ءتىپتى, ونى تولىق اياقتاۋ قاجەت پە دەگەن سۇراقتىڭ ءوزى وزەكتى», دەدى مينيستر.