كوللاجدى جاساعان – زاۋرەش سماعۇل, «EQ»
جاستاردىڭ قۇقىقتىق مادەنيەتىن ارتتىرىپ, سىبايلاس جەمقورلىققا قارسى كوزقاراسىن قالىپتاستىرۋدى ماقسات تۇتقان جيىنعا مەكتەپ وقۋشىلارى, كوللەدج جانە جوعارى وقۋ ورىندارىنىڭ ستۋدەنتتەرى, سونداي-اق قوعامدىق ۇيىم وكىلدەرى قاتىستى. فورۋمنىڭ اشىلۋىندا اباي وبلىسى ىشكى ساياسات باسقارماسىنىڭ باسشىسى جارقىن ءجۇمادىلوۆ قاتىسۋشىلارعا ساتتىلىك تىلەي وتىرىپ, اتالعان ءىس-شارانىڭ قوعامداعى ماڭىزىن ايتتى.
«مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ء«بىز زاڭ مەن ءتارتىپ, ءبىلىم مەن پاراسات ۇستەمدىك ەتەتىن قوعام قۇرۋىمىز كەرەك», دەپ اتاپ ءوتتى. بۇل مىندەتتىڭ تابىستى ورىندالۋى جاس ۇرپاقتىڭ بويىنا ادالدىق, جاۋاپكەرشىلىك جانە ازاماتتىق مادەنيەتتى سىڭىرۋگە تىكەلەي بايلانىستى. سىبايلاس جەمقورلىق – كەز كەلگەن مەملەكەتتىڭ دامۋىن تەجەيتىن قاۋىپتى قۇبىلىس. وعان ەڭ ءتيىمدى قارسى شارا – الدىن الۋ, ياعني سانانى وزگەرتۋ جانە ءبىلىم ارقىلى قوعامدىق مادەنيەتتى قالىپتاستىرۋ. بۇگىنگى فورۋم – وسى ماقساتقا باعىتتالعان ماڭىزدى باستامانىڭ ءبىرى», دەدى ج.ءجۇمادىلوۆ.
فورۋم قاتىسۋشىلارى قوعامداعى ادالدىق, ادىلەتتىلىك جانە جاۋاپكەرشىلىك قۇندىلىقتارىن قالىپتاستىرۋ جونىندەگى پىكىرلەرىمەن ءبولىستى. شاكارىم ۋنيۆەرسيتەتىنىڭ رەكتورى دۋمان ورىنبەكوۆ, وبلىس ءبىلىم باسقارماسىنىڭ باسشىسى باۋىرجان ەردەمبەكوۆ, جاستار بەلسەندىسى قۋانىش مولداقاشەۆ, ر.بايسەيىتوۆ اتىنداعى سەمەي قارجى-ەكونوميكالىق كوللەدجىنىڭ ستۋدەنتى نازەركە كادەكوۆا جاس بۋىنعا ارنالعان جاڭا پروفيلاكتيكالىق باعدارلامالاردى تانىستىرىپ, ءوز كوزقاراسىن ءبىلدىردى. رەكتور دۋمان ورىنبەكوۆ ءبىلىم ورنىنداعى ادالدىق قاعيداتىن نىعايتۋ جونىندە اتقارىلىپ جاتقان جۇمىستارىن تانىستىردى.
«ۋنيۆەرسيتەت تاراپىنان ادالدىق قاعيداتىن قالىپتاستىرۋ ماقساتىندا ستۋدەنتتەرىمىز وزدەرىنىڭ تىڭ يدەيالارى مەن جوبالارىن ۇسىنىپ كەلەدى. بۇل باستامالار جاستاردىڭ جاۋاپكەرشىلىگىن ارتتىرىپ قانا قويماي, اكادەميالىق ادالدىق مادەنيەتىن نىعايتۋعا زور ۇلەسىن قوسىپ جاتىر. سونىڭ ناتيجەسىندە ءبىز وقۋ ورنىندا جاڭا باعىتتارعا بەت بۇرىپ, اشىقتىق پەن ادىلدىككە نەگىزدەلگەن ورتانى قالىپتاستىرۋعا مۇمكىندىك الىپ وتىرمىز», دەدى رەكتور.
تاعى ءبىر ماڭىزدى باعىت – وڭىردە جۇزەگە اسىرىلىپ جاتقان «ادال ازامات» ءبىرتۇتاس تاربيە باعدارلاماسى. بۇل باعدارلاما مەكتەپكە دەيىنگى كەزەڭنەن باستاپ قۇقىقتىق ساۋات, ازاماتتىق جاۋاپكەرشىلىك جانە ادىلدىك قاعيداتتارىن قالىپتاستىرۋدى كوزدەيدى. قازىرگى تاڭدا وڭىردەگى 286 مەكتەپتە 7 375 وقۋشىنى قامتيتىن «ادال ۇرپاق» كلۋبتارى, سونداي-اق 30 ستۋدەنتتىك كلۋبتا 490 ستۋدەنت جۇمىس ىستەيدى.
ء«بىزدىڭ باستى مىندەتىمىز – جاس ۇرپاققا جاۋاپتى ازاماتتىق قاسيەتتەردى ءسىڭىرىپ, ولاردى ادال جانە قۇقىققا قۇرمەتپەن قارايتىن ازاماتتار رەتىندە تاربيەلەۋ. «ادال ازامات» باعدارلاماسى مەكتەپتەن باستاپ قۇقىقتىق ساۋات, ادىلدىك پەن ادالدىق قاعيداتتارىن قالىپتاستىرۋعا باعىتتالعان. قۇقىقتىق مادەنيەت جۇيەلى تۇردە ەنگىزىلگەن جاعدايدا وقۋشىلاردىڭ قۇقىقتىق ساۋاتى ارتىپ, مەكتەپتەگى ءتارتىپ دەڭگەيى نىعايادى, سىبايلاس جەمقورلىققا توزبەۋشىلىك مادەنيەتى قالىپتاسادى, ادىلدىك, ادالدىق جانە جاۋاپكەرشىلىك قۇندىلىقتارى وقۋشىلاردىڭ مىنەز-قۇلقىنىڭ نەگىزىنە اينالادى», دەدى ب.ەردەمبەكوۆ.
اباي وبلىسى
