ورتا تولا بەرەدى

قاراكوز قانداستاردىڭ 44,5%-ى وزبەكستاننان, 43,6%-ى قىتايدان, 4,1%-ى تۇرىكمەنستاننان, 3%-ى موڭعوليادان, 2,5%-ى رەسەيدەن, 2,3%-ى باسقا ەلدەردەن كەلگەن. 1 جەلتوقسانداعى جاعداي بويىنشا ەڭبەككە قابىلەتتى جاستاعى ەتنوستىق قونىس اۋدارۋشىلار سانى 57,4%-دى, ەڭبەككە قابىلەتتى جاستان كىشى 34%-دى, زەينەتكەرلەر 8,6%-دى قۇرايدى.

ەڭبەككە قابىلەتتى جاستاعى قانداستاردىڭ 15%-ى جوعارى ءبىلىمدى, 27,6%-ى ورتا كاسىبي ءبىلىمدى, 51,1%-ى جالپى ورتا ءبىلىمدى, 6,3%-نىڭ ءبىلىم جوق.

اتامەكەنىنە ورالعان قانداستار ەلىمىزدىڭ ءتۇرلى وڭىرلەرىنە قونىستاندى. نەگىزىنەن ەڭبەك كۇشى تاپشى اقمولا, اباي, قوستاناي, پاۆلودار, اتىراۋ, باتىس, شىعىس, سولتۇستىك قازاقستان وبلىس­تارىنا ورنالاستىرىلدى. قونىستاندىرۋ وڭىرلەرىندە بيىلعا ارنالعان قانداستاردى قابىلداۋ كۆوتاسى 2 309 ادامدى قۇرايدى. 1 جەلتوقسانعا دەيىن قونىستاندىرۋ وڭىرلەرىنە 2 218 ازامات كوشىپ كەلدى.

كوشىپ-قونۋعا سۋبسيديا تۇرىندە ءبىر مەزگىلدە وتاعاسىنا, وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە, تۇرعىن ءۇي جالداۋعا, كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59 مىڭنان 118 مىڭ تەڭگەگە دەيىن) مولشەرىندە مەملەكەتتىك قولداۋ شارالارى ۇسىنىلادى. جىل باسىنان بەرى 1279 قانداسقا ءتۇرلى قولداۋ شارالارى كورسەتىلدى. 356 ادام تۇراقتى جۇمىسقا ورنالاستىرىلدى. سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋعا قاتىستى ينستيتۋتسيونالدىق شارالار قابىلداندى. تۇرعىن ءۇي ساتىپ الۋ, سالۋ, يپوتەكالىق تۇرعىن ءۇي قارىزدارىنىڭ باستاپقى جارناسىنىڭ ءبىر بولىگىن جابۋعا ارنالعان ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,56 ملن تەڭگەگە دەيىنگى مولشەردە بىرجولعى وتەۋسىز, قايتارىمسىز نەگىزدە بەرىلدى.