وبلىس كولەمىندە جۇمىسپەن قامتۋدى ۇيلەستىرۋ, ايماق تۇرعىندارىنىڭ ءومىر ساپاسىن ارتتىرۋ باعىتىندا بىرقاتار جۇمىس قولعا الىنعان. الدىمەن الەۋمەتتىك ساياساتتا ادام كاپيتالىنىڭ ماڭىزدىلىعى زور ەكەندىگىن ايتا كەتۋگە ءتيىسپىز. دارقان دالانىڭ دانالىعىن بويىنا سىڭىرگەن ارىداعى جۇرت «قارتى باردىڭ قازىناسى بار» دەپ تەگىن ايتپاعان. تاربيە توركىنى دە ومىردەن كورگەنى, تۇيگەنى كوپ قاريالاردىڭ كوكىرەگىندە. جاس تولقىن الدىڭعى بۋىن اعالاردىڭ عيبراتتى عۇمىرىن ومىرشەڭ ونەگە رەتىندە پايدالانسا قۇبا-قۇپ. سول تۇرعىدا ەكى بۋىننىڭ اراسىندا جاندى بايلانىس ورناتقان ءلازىم. بۇگىنگى ات جالىن تارتىپ مىنگەن جاستار ەلىنە ەڭبەگى سىڭگەن ارداگەرلەردىڭ ماڭداي تەرىن سىيلاپ, قۇرمەت كورسەتسە قوعامدى ىزگىلەندىرەتىن دە وسى ىقىلاس. ادامگەرشىلىككە نەگىزدەلگەن ىزگى قاسيەتتەر تەرەڭگە تامىر جايسىن دەسەك, جاستاردى قارتتاردى سىيلاۋعا, ولارعا جان-جاقتى قامقورلىق كورسەتۋگە تاربيەلەۋدىڭ ماڭىزى زور.
وڭىردە جىل سايىن قازان ايىندا قارتتاردى قولداۋ ايلىعى وتكىزىلىپ, اۋقىمدى شارالار ۇتىمدى ۇيلەستىرىلەدى. بيىل ايلىق بارىسىندا 2400-دەن استام ءىس-شارا وتكىزىلىپ, وعان ورتاشا ەسەپپەن العاندا 54 مىڭ ادام قاتىستى. ءبىر مەزەتتىك شارا بولسا دا قاريالار وزدەرىن ەلەپ-ەسكەرىپ, جاندى قامقورلىق كورسەتكەن جاستارعا ءدان ريزا بولىپ, ءبىر جادىراپ قالدى. كونتسەرتتىك باعدارلامالار مەن مازمۇندى كەزدەسۋلەردەن باستاپ, مەديتسينالىق تەكسەرۋلەردىڭ اسەرى مول بولدى. قارت ادامدارعا كوممۋنالدىق-تۇرمىستىق ماسەلەلەرىندە الەۋمەتتىك قولداۋ كورسەتىلدى. بۇل ماقساتقا جەرگىلىكتى بيۋدجەتتەن 910 ميلليون تەڭگە قاراجات ءبولىنىپ, وبلىستىڭ 35 مىڭ زەينەتكەرىنە ءبىر رەتتىك كومەك, 1200 ادامعا ساناتوريلىق-كۋرورتتىق ەمدەلۋگە جولداما بەرىلدى. كوكشەتاۋ قالاسىنىڭ 31 مىڭ زەينەتكەرىنىڭ قوعامدىق كولىكتە تەگىن ءجۇرۋى قامتاماسىز ەتىلىپ, 322 تۇرعىنعا وتىن-كومىر الۋعا كومەك كورسەتىلدى.
– پرەزيدەنت جولداۋىندا ناقتى كورسەتىلگەنىندەي, الەۋمەتتىك قولداۋ تەك بيۋدجەت ەسەبىنەن عانا ەمەس, بەلسەندى, جاناشىر ازاماتتاردىڭ قاتىسۋىمەن جۇزەگە اسقاندا عانا ناتيجەلى بولادى, – دەيدى وبلىستىق جۇمىسپەن قامتۋدى ۇيلەستىرۋ مەن الەۋمەتتىك باعدارلامالار باسقارماسىنىڭ باسشىسى شولپان راحماتۋللينا. – بۇل رەتتە كاسىپكەرلەر مەن قوعامدىق ۇيىمداردىڭ 122 ملن تەڭگە كولەمىندە دەمەۋشىلىك كومەك كورسەتۋى وڭىردە الەۋمەتتىك جاۋاپكەرشىلىكتى تۇسىنە بىلەتىن ادامدار قاتارى از ەمەستىگىن ايعاقتايدى. سونىڭ ارقاسىندا الەۋمەتتىك قولداۋمەن قامتىلعاندار سانى جىل سايىن كوبەيىپ كەلەدى. الەۋمەتتىك ساياساتتىڭ باستى ۇستانىمى – الەۋمەتتىك قولداۋدىڭ ادىلدىگى مەن قولجەتىمدىلىگى. بۇگىندە 81 مىڭعا جۋىق ازامات مەملەكەتتىك قولداۋمەن قامتىلىپ وتىر. سونىمەن قاتار 46 الەۋمەتتىك مەكەمەدە 1300 ادام تۇراقتى تۇردە قولداۋ-كومەك الادى. وبلىستاعى جالعىز سوعىس ارداگەرى نۇرعاسىم اجىتاەۆ پەن 1 216 تىل ارداگەرىنە ەرەكشە قامقورلىق كورسەتىلدى.
وبلىس كولەمىندە مۇگەدەكتىگى بار ازاماتتاردى قولداۋ, ءومىر ءسۇرۋ ساپاسىن جاقسارتۋ بارىسىندا ناقتى قادامدار جاسالىپ جاتىر. وڭىردە 29 مىڭنان استام ازامات وسىنداي ساناتقا جاتادى. ولاردىڭ 13 مىڭىنا وڭالتۋ قۇرالدارى مەن ارقيلى قىزمەتتەر ۇسىنىلعان. ماسەلەن, «ينۆاتاكسي» قىزمەتى 9 اۋدان مەن قالادا قولجەتىمدى, بيىل 32 مىڭ ادامعا تاسىمال قىزمەتى كورسەتىلدى. مۇگەدەكتەر كۇنىنە وراي 300 ملن تەڭگەدەن استام ءبىر جولعى تولەم جاسالدى.
وبلىس اۋماعىنداعى «بەلسەندى ۇزاق ءومىر ءسۇرۋ» ورتالىقتارىنىڭ جۇمىسى ينكليۋزيۆتى قىزمەت كورسەتۋدىڭ ماڭىزدى بۋىنى. بۇل ورتالىقتار قارىم-قاتىناس, سپورت, شىعارماشىلىق ارقىلى الەۋمەتتىك بەيىمدەلۋدىڭ ءتيىمدى الاڭىنا اينالعان.
وڭىردە جىل باسىنان بەرى 31 مىڭنان استام جۇمىس ورنى اشىلىپ, جۇمىسسىزدىق دەڭگەيى 4,5%-عا قىسقاردى. «كۇمىس جاس», «جاستار پراكتيكاسى» سىندى باعدارلامالاردىڭ ناتيجەسى ايقىن بايقالىپ وتىر. وسى باعدارلامالار اياسىندا كوپتەگەن تۇرعىن تۇراقتى جۇمىسپەن قامتىلىپ, جاس ماماندار قاجەتتى تاجىريبە جيناقتايدى. مۇنىڭ ءوزى كوپ-كورىم كومەك. مەملەكەت تاراپىنان سۋبسيديالاناتىن قوعامدىق جۇمىستار 2,4 مىڭ ادامنىڭ جۇمىسپەن قامتىلۋىنا سەپ بولدى.
مەملەكەت باسشىسىنىڭ تاپسىرماسىنا سايكەس شاعىن كاسىپكەرلىككە گرانتتار بەرۋ جالعاسىپ كەلەدى. بيىل بيزنەس يدەيالاردى قولداۋعا 175 گرانت بەرىلىپ, كاسىپكەرلەر 267,8 ملن تەڭگە كولەمىندە قارجىلاندىرىلدى. بۇل جۇمىس ىستەيمىن دەپ العا ۇمتىلعانداردىڭ ءوز ءىسىن باستاۋىنا مۇمكىندىك بەرىپ, الدارىنان كەڭ جول اشادى.
وڭىردە كوپبالالى, از قامتىلعان وتباسىلاردى قولداۋ فورماتىن زامان تالابىنا ساي جەتىلدىرۋ تۇرعىسىندا دا ايتا قالارلىقتاي تىڭ سەرپىلىس بار. جىل باسىنان بەرى بارلىعى 1475 وتباسىنا 709,7 ملن تەڭگە كولەمىندە اتاۋلى الەۋمەتتىك كومەك تاعايىندالدى. سونداي-اق الەۋمەتتىك كەلىسىمشارت اياسىندا 115 ادام تۇراقتى جۇمىسقا ورنالاسىپ, 539 كوپبالالى وتباسى مەن 2138 بالا ءتۇرلى الەۋمەتتىك تولەمدەرمەن قامتىلدى.
پرەزيدەنت جولداۋىندا مەملەكەتتىك قىزمەتتەردىڭ اشىقتىعى, تسيفرلاندىرۋ, الەۋمەتتىك كومەكتىڭ دالدىگى باستى نازارعا الىنعان. الداعى جىلدىڭ جوسپارى وسى باعىتتاردى تولىق قامتىپ, ىلكىمدىلىكتىڭ مەيلىنشە ناتيجەلى بولۋىن كوزدەيدى. اتاپ ايتقاندا, الەۋمەتتىك باعدارلامالاردىڭ تيىمدىلىگىن ارتتىرۋ, تۇراقتى جۇمىس ورىندارىن اشۋ, بيزنەس باستامالاردى قولداۋ, الەۋمەتتىك قىزمەتتەردى تولىق تسيفرلاندىرۋ كۇن تارتىبىندەگى ماسەلەلەر.
– بۇل اتالعان جۇمىس تاسىلدەرىنىڭ بارلىعى دەرلىك الەۋمەتتىك قولداۋدى نەعۇرلىم ماقساتتى, ءادىل ەتۋگە مۇمكىندىك بەرەدى, – دەيدى باسقارما باسشىسى ش.راحماتۋللينا.
قارتتاردى قولداۋ, ينكليۋزيۆتى قوعام قالىپتاستىرۋ, كوپبالالى وتباسىلاردى دەمەۋ, سونداي-اق قولىنان ءىس كەلەتىن ازاماتتاردىڭ كاسىپپەن شۇعىلدانۋىنا مۇمكىندىك تۋدىرۋ الەۋمەتتىك ساياساتتىڭ وزەگى. وسى مىندەتتەر ناقتى ورىندالىپ, ەل ىشىندەگى بىرلىك-بەرەكە ارتسا, كوكىرەكتەردەگى سەنىم دە نىعايا تۇسەدى.
اقمولا وبلىسى
