مۇندا قازاق حاندىعىنىڭ جازبا مۇرالارى, تسين پاتشالىعىنا جولدانعان ديپلوماتيالىق قۇجاتتار, قازاق حاندىعىنىڭ تسين ەلىنە ەلشى اتتاندىرۋ ۇدەرىسى, سونداي-اق ديپلوماتيالىق قۇجاتتاردىڭ ترانسليتەراتسياسى, ترانسكريپتسياسى, قازىرگى قازاق تىلىندەگى اۋدارماسى جان-جاقتى قامتىلعان.
كىتاپتىڭ تۇساۋكەسەرىندە اۆتور ەڭبەكتىڭ ماڭىزدىلىعىنا توقتالدى: «تاريحي دەرەكتانۋ عىلىمىنىڭ زەرتتەۋ نىسانى – ىقىلىم زاماننان بۇگىنگە دەيىن جەتكەن تاريحي قۇندىلىققا يە بارلىق جازبا دەرەكتەر. سول دەرەكتەردىڭ ماڭىزدى بولىگى – مۇراعات قۇجاتتارى. قازاققا قاتىستى مۇراعات ماتەريالدارى سانى جاعىنان كوپ بولماسا دا, ءار داۋىردە, ءار وڭىردە, ءتۇرلى تىلدە جازىلىپ, ساقتالعان. 1757 جىلى قازاق حاندىعى مەن تسين پاتشالىعى اراسىندا رەسمي ديپلوماتيالىق قارىم-قاتىناس ورناپ, ءوزارا حات الماسۋ كۇشەيە ءتۇستى. كىتاپ ءدال وسى تاريحي كەزەڭ مەن قۇجاتتارعا نەگىزدەلىپ جازىلعان. بۇل ەڭبەك ەۋرازيا ۇلتتىق ۋنيۆەرسيتەتىنىڭ پروفەسسور-وقىتۋشىلار قۇرامى مەن ستۋدەنتتەرىنە پايدالى بولادى دەپ سەنەمىن», – دەدى كىتاپ اۆتورى دۇيسەنالى ءابدىلاشىم ۇلى.
تۇساۋكەسەردە قازاق حاندىعى داۋىرىندەگى ديپلوماتيالىق قۇجاتتاردىڭ تاريحي ءمانى, تسين پاتشالىعىمەن بولعان ساياسي بايلانىس, سونداي-اق قازاقتىڭ جازۋ مادەنيەتى مەن دەرەكتانۋلىق زەرتتەۋ ماسەلەلەرى تالقىلاندى. كىتاپتاعى جاڭا ارحيۆتىك دەرەكتەردىڭ وتاندىق تاريح عىلىمىنا قوساتىن ۇلەسى, قۇندى قۇجاتتاردىڭ حالقىمىزدىڭ تاريحىن, مەملەكەتتىك باسقارۋ جۇيەسىن جانە سىرتقى ساياسي بايلانىستارىن قايتا زەردەلەۋدە, سونداي-اق قازاقتىڭ جازۋ مادەنيەتىن تەرەڭ زەرتتەۋدە تەڭدەسى جوق دەرەككوز ەكەنى ايتىلدى.
اتالعان ەڭبەك – اۆتوردىڭ كوپ جىلدار بويى جۇرگىزگەن جۇيەلى عىلىمي زەرتتەۋىنىڭ ناتيجەسى. وسى سالا بويىنشا ەل ىشىندە دە, شەتەلدە دە تۇڭعىش رەت دايىندالعان, مازمۇنى تەرەڭ, دەرەكتىك نەگىزى بەرىك عىلىمي مونوگرافيانىڭ ماڭىزى زور. زەرتتەۋ اياسىندا قىتاي مۇراعات قورلارىندا ساقتالعان قازاق حاندارى مەن سۇلتاندارىنىڭ 160 ديپلوماتيالىق حاتى, سونداي-اق تسين پاتشالىعىنىڭ 6 پاتشا جارلىعى عىلىمي اينالىمعا ەنگىزىلدى. سونىمەن قاتار 31 تاريحي قۇجاتتىڭ فاكسيميلەسى بەرىلىپ, ءتول جازبا مۇرامىزدىڭ مازمۇنى, ءتىلى مەن جازۋ مادەنيەتى جان-جاقتى تالداندى.
