الماتىدا ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە تولىق اۆتوماتتاندىرىلعان قىزمەت كورسەتۋ كىتاپحاناسى اشىلدى. وزىنە-ءوزى قىزمەت كورسەتەتىن قازاقستانداعى العاشقى جوعارى وقۋ ورنىنداعى زاماناۋي فورماتتا جۇمىس ىستەيتىن كىتاپحانا العاشقى وقىرمانداردىڭ تاپسىرىن قابىلدادى.
بۇگىندە الماتى قالاسى اۆتونومدى كىتاپحانا ستانسالارىن ەنگىزۋ بويىنشا كوش باستاپ تۇر. مەگاپوليستە وسىنداي 26 جۇيە جۇمىس ىستەپ جاتىر. دەگەنمەن, بۇل تاجىريبەنى ۋنيۆەرسيتەتتىك ورتاعا ەنگىزۋ جوعارى ءبىلىم بەرۋ تاريحىن جاڭعىرتتى دەۋگە بولادى.
اۆتوماتتاندىرىلعان ستانتسيا ءبىلىم الۋ پروتسەسىن قولايلى ءارى جىلدام ورىنداۋعا باعىتتالعان. ەگەر كلاسسيكالىق ابونەمەنت جۇمىس كەستەسىنە تاۋەلدى بولسا, جاڭا جۇيە كىتاپتى ساناۋلى سەكۋندتار ىشىندە الۋعا نەمەسە قايتارۋعا مۇمكىندىك بەرەدى. ول ءۇشىن پايدالانۋشىعا جەكە وقىرمان بيلەتىن قولدانۋ جەتكىلىكتى. جۇيە ادەبيەتتى بىردەن انىقتاپ, دەرەكتەردى وقىرماننىڭ تسيفرلىق پروفيلىندە جاڭارتادى.
كىتاپحانانىڭ اشىلۋىندا ابىلاي حان اتىنداعى قازحقجاتۋ رەكتورى, اكادەميك ءساليما قۇنانباەۆا: «بۇگىن ۋنيۆەرسيتەت مەملەكەت باسشىسى العا قويعان ءبىلىم بەرۋدى تسيفرلاندىرۋ مىندەتتەرىن ىسكە اسىرۋ جولىندا ماڭىزدى قادام جاسادى. ەلىمىزدەگى جوعارى وقۋ ورىندارى اراسىندا العاش رەت اۆتوماتتاندىرىلعان كىتاپحانانىڭ اشىلۋى جاي عانا ينفراقۇرىلىمدى جاڭارتۋ ەمەس, ءبىلىم تۇتىنۋ مادەنيەتىنىڭ تۇبەگەيلى وزگەرۋى. ءبىز ستۋدەنتتەر ءۇشىن زاماناۋي تەحنولوگيالار اكادەميالىق ەركىندىك پەن الەمدىك رەسۋرستارعا قولجەتىمدىلىكتى قامتاماسىز ەتەتىن ينتەللەكتۋالدى ەكوجۇيە قۇرۋعا ۇمتىلامىز. وزىنە-ءوزى قىزمەت كورسەتۋ كىتاپحاناسى ۋنيۆەرسيتەتىمىزدىڭ اشىقتىعى, سەنىم مەن يننوۆاتسيالىق دامۋ باعىتىنىڭ سيمۆولى», دەپ جاڭا جۇيەنىڭ ستراتەگيالىق ماڭىزىن اتاپ ءوتتى.
جوبا كىتاپ قورىن پايدالانۋ ءۇردىسىن وڭتايلاندىرىپ قويماستان, زاماناۋي جانە ءينتۋيتيۆتى فورماتتار ارقىلى جاستاردىڭ وقۋعا دەگەن قىزىعۋشىلىعىن ارتتىرادى. كىتاپتى تەگىن پايدالانۋمەن تەحنولوگيالىق مۇمكىندىكتەر ستانساسى ۋنيۆەرسيتەتتەگى ەڭ تارتىمدى ورتالىققا اينالارى ءسوزسىز. وزىنە-ءوزى قىزمەت كورسەتۋ كىتاپحاناسى وقۋ پروتسەسى مەن عىلىمي-زەرتتەۋ قىزمەتىن قولداۋدىڭ ماڭىزدى قۇرالىنا اينالىپ, جوعارى وقۋ ورنىنىڭ يننوۆاتسيالىق ءبىلىم بەرۋ ورتالىعى رەتىندەگى بەدەلىن نىعايتا تۇسەدى.
