فوتو: istockphoto.com
«قازاقستان – شىعىس پەن باتىستىڭ اراسىنداعى التىن كوپىر. ءبىز بۇل مۇمكىندىكتى ۇتىمدى پايدالانۋىمىز قاجەت. سونىمەن قاتار قازىر ەكونوميكامىزدا تۇبەگەيلى وزگەرىستەر جاسالىپ جاتىر. ءبىز ەل ەكونوميكاسىنىڭ دامۋىنا قوسىمشا سەرپىن بەرۋ ءۇشىن ماڭىزدى جوبالاردى قولعا الدىق. بۇگىندە سول جۇمىستىڭ ناتيجەسىن دە كورە باستادىق. سوڭعى بەس جىلدا ۇلتتىق ەكونوميكا 15,8%-عا ءوستى. بيىلعى ءوسىم 6 پايىزدان استى. بۇل – 2012 جىلدان بەرگى ەڭ جوعارى كورسەتكىش», دەدى پرەزيدەنت.
مەملەكەت باسشىسىنىڭ ايتۋىنشا, جان باسىنا شاققاندا ىشكى جالپى ءونىم 47 پايىزعا ارتتى. التىن-ۆاليۋتا رەزەرۆى جانە ۇلتتىق قور اكتيۆتەرىنىڭ كولەمى رەكوردتىق مەجەگە جەتىپ, 125 ميلليارد دوللاردان استى.
«بيىل «دوستىق – مويىنتى» تەمىرجولىنىڭ ەكىنشى جەلىسى مەرزىمىنەن بۇرىن ىسكە قوسىلدى. بۇل – تاۋەلسىزدىك كەزەڭىندەگى ەڭ ءىرى تەمىرجول قۇرىلىسى. بىرنەشە ايدا وسى جولمەن قوسىمشا 6 ميلليون توننا جۇك تاسىمالداندى. قازىر «مويىنتى – قىزىلجار» باعىتىندا تەمىرجول سالىنىپ جاتىر. قازاقستان – شىعىس پەن باتىستىڭ اراسىنداعى التىن كوپىر. ءبىز بۇل مۇمكىندىكتى ۇتىمدى پايدالانۋىمىز قاجەت. وسى جىلى 13 مىڭ شاقىرىم اۆتوكولىك جولى سالىنىپ, جوندەلۋدە», دەدى قاسىم-جومارت توقاەۆ.
اۋە قاتىناسىن دامىتۋ ىسىنە دە باسا ءمان بەرىلىپ جاتىر. الەمنىڭ ءىرى قالالارىمەن تىكەلەي قاتىناس ورناتىلىپ جاتىر, 36 جاڭا اۋە رەيسى اشىلدى.
«قازاقستان ەۋرازيا قۇرلىعىنداعى ترانزيت حابى رەتىندە قالىپتاسۋى ابدەن مۇمكىن. بۇل – ستراتەگيالىق ماڭىزى بار ماقسات. سونداي-اق ينتەرنەت ەلىمىزدەگى ازاماتتاردىڭ 90%-ىنا قولجەتىمدى بولدى. قازاقستان – Starlink جەلىسىنە يە بولعان ورتالىق ازياداعى العاشقى مەملەكەت. ەلىمىز قۇرىلىس سالاسىندا زور تابىسقا جەتتى. بيىل 19 ميلليون شارشى مەتردەن استام تۇرعىن ءۇي سالىندى. مىڭداعان وتباسى باسپانالى بولدى», دەدى پرەزيدەنت.
ەسكە سالايىق, بۇگىن مەملەكەت باسشىسى جامبىل وبلىسىنا جۇمىس ساپارىمەن باردى.
