قازىر قۇقىقتىق ءتارتىپ اسكەرىنىڭ بولىمشەلەرىندە الەم چەمپيونى, اكروبات, پوليگلوت, ديكتور, جالپى ونەرپازدار قىزمەت ەتەدى. ولاردىڭ جەتىستىكتەرى زاماناۋي ارميا قارۋ-جاراقتى عانا ەمەس, سونىمەن قاتار اقىل-ويدى, مادەنيەت پەن شىعارماشىلىقتى بىرىكتىرەتىنىن دالەلدەيدى. بيىل ۇلتتىق ۇلان وسىنداي قۇراممەن ەرەكشەلەندى.
ۇلتتىق ۇلان ساپىنداعى تالانتتىڭ ءبىرى – گىر سپورتىنان ءۇش دۇركىن الەم چەمپيونى ەركەبۇلان كەلدىباەۆ. ونى قارۋلاستارى ء«ححى عاسىر قاجىمۇقانى» دەپ اتايدى. الىپ بالۋان قاجىمۇقان مۇڭايتپاسوۆتى ۇلگى ەتكەن ول الماتىداعى 5571 اسكەري بولىمىندە وتان الدىنداعى بورىشىن وتەپ جاتىر. شىمىرلىق پەن قىراعىلىقتى ۇشتاستىرعان ەركەبۇلان مەگاپوليستىڭ قاۋىپسىزدىگىنە ۇلەس قوسىپ كەلەدى.
ال ەلورداداعى قۇرامدا اسكەري بورىشىن وتەپ جۇرگەن باتىرحان ساعيدوللا – جۇرتشىلىقتى مانەرلى دە قوڭىر داۋىسىمەن سۇيسىندىرگەن سارباز. ول باس قالانىڭ قوعامدىق ءتارتىبى مەن تۇرعىنداردىڭ قاۋىپسىزدىگىن باقىلايدى. بوس ۋاقىتىندا باتىرحان ديكتسياسىن ماشىقتاپ, ولەڭ وقيدى, ءماتىن جازادى. اتى اڭىزعا اينالعان ديكتور يۋري لەۆيتان مەن قازاق راديوسىنىڭ التىن داۋىسى انۋاربەك بايجانباەۆتىڭ مۇراعاتتاعى جازبالارىن تىڭدايدى. ونىڭ باستى ارمانى – استانادا وتەتىن جەڭىس شەرۋىن جۇرگىزۋ. جاس ساربازدىڭ ايتۋىنشا, قازىر ول ءبولىم ىشىندەگى سالتاناتتى جيىنداردى, اسكەري شەرۋگە دايىندىقتار مەن ءتۇرلى ءىس-شارانى جۇرگىزىپ دايىندالىپ, ءماتىن وقىپ, جاتتاپ, داۋىستى دۇرىس قويۋعا, ينتوناتسيامەن ويناۋعا قاتىستى كۋرستاردا تالانتىن دامىتىپ ءجۇر. «تابيعي داۋىسىم بولسا دا, ول ۇلكەن ەڭبەكتى تالاپ ەتەدى», دەيدى ول. قارۋلاس دوستارى باتىرحاندى ء«بىزدىڭ لەۆيتان» دەپ اتايدى. قولباسشىلىق تا باتىرحاننىڭ بۇل ۇمتىلىسىن قولداپ وتىر. پاۆلودار قالاسىنان اسكەر قاتارىنا شاقىرىلعان باتىرحان اسكەردەگى تەمىردەي تارتىپكە باعىنا وتىرىپ, جەكە داعدىنى دا ماشىقتاۋعا بولاتىنىن ايتادى.
6506 اسكەري ءبولىمى جەكە قۇرامىنىڭ قاتارىن تولىقتىرعان قوس اكروبات ارمان قايىرباەۆ پەن ازيزبەك قالماعانبەتوۆ تە ەرەكشە قۇرمەتكە لايىق. كاسىبي مامانداردىڭ دەنە شىنىقتىرۋى, توزىمدىلىگى مەن جاۋاپكەرشىلىگى – قارۋلاستارىنا ۇلگى. ولار تسيرك مانەجىن اسكەري پلاتسقا, ساحنالىق سەرىكتەستىكتى جاۋىنگەرلىك باۋىرلاستىققا اينالدىردى. وتان قورعاۋشى اتانعان بۇرىنعى ارتىستەر بۇگىندە شىمكەنت كوشەلەرىنىڭ تىنىشتىعىن قىراعىلىقپەن قورعاپ ءجۇر.
سونداي-اق ابايدىڭ ونداعان ولەڭىن جاتقا بىلەتىن جاۋىنگەر جۇلدىزبەك روماشەۆ «جۇلدىزعا» اينالدى. اباي كۇنىن مەرەكەلەۋ قارساڭىندا ول تاقىرىپتىق ءىس-شارالار مەن پوەتيكالىق كەشتەرگە بەلسەنە قاتىسىپ, اباي شىعارماشىلىعىن ۇزەڭگىلەستەرىنە پاش ەتتى. ونىڭ بۇل ونەرى وتانعا قىزمەت ەتۋ تارتىپتەن عانا ەمەس, رۋحاني قۇندىلىقتاردان باستالاتىنىن كورسەتەدى.
ونەرلى ساربازدار قاتارىندا پوليگلوتتار دا بار. 5571 اسكەري ءبولىمىنىڭ ساربازى ۆلاديمير كوپىلوۆ بەس ءتۇرلى تۇركى ءتىلىن, سونداي-اق بىرنەشە سيرەك ديالەكتىنى ەركىن مەڭگەرگەن. بۇل وعان الماتى كوشەلەرىندە قوعامدىق ءتارتىپتى قامتاماسىز ەتۋ كەزىندە ءتۇرلى ۇلت وكىلدەرىمەن ورتاق ءتىل تابىسۋعا كومەكتەسەدى. ۆلاديمير قىزمەتتەن بوس ۋاقىتىندا ارميا ءومىرىن ءوز بلوگىندە ناسيحاتتاپ, بولىمشەنىڭ وڭ ءيميدجىن قالىپتاستىرۋعا ەلەۋلى ۇلەس قوسىپ كەلەدى.
مۇنداي ساربازدار ۇلتتىق ۇلاندى مىقتى, ءبىلىمدى, جان-جاقتى تۇلعالار قىزمەت ەتەتىن تالانتتار ورداسى دەپ اتاۋعا لايىق ەكەنىن كورسەتەدى.
