الماتى قالاسى المالى اۋدانىنىڭ قورعانىس ىستەرى جونىندەگى باسقارماسىنىڭ اسكەري قىزمەتشىلەرى قاريانىڭ شاڭىراعىنا ارنايى بارىپ, تۋعان كۇنىمەن قۇتتىقتادى. ولار مايدانگەرگە قورعانىس ءمينيسترىنىڭ قۇتتىقتاۋ حاتى مەن سىيلىق تابىس ەتتى.
«سوعىس ارداگەرلەرى ەرەكشە نازار مەن قۇرمەتكە لايىق. ولاردىڭ ءبىزدىڭ يگىلىگىمىز ءۇشىن جاساعان ەڭبەگىن باعالاپ, العىس ءبىلدىرۋ وتە ماڭىزدى», دەدى المالى اۋدانى قورعانىس ىستەرى جونىندەگى باسقارمانىڭ توپ باستىعى, كاپيتان گۇلسىم باكىروۆا.
ەگدە تارتقانىنا قاراماستان, ارداگەر قوناقتاردى جاقسى كوڭىل كۇيمەن قارسى الىپ, سوعىس جىلدارىنان ەستەلىكتەر ايتتى.
ۆاسيلي فوميچ 1923 جىلى 23 جەلتوقساندا التاي ولكەسىنىڭ كارپوۆو اۋىلىندا دۇنيەگە كەلگەن. كىشى اۆياتسيا ماماندارىن دايارلايتىن مەكتەپتە وقىپ, اۋە اتقىشى جانە راديست ماماندىقتارىن مەڭگەرگەن. جاۋىنگەرلىك جولىن 1944 جىلى ساۋىردە باستاعان. ول كەزدە جاسى نەبارى 21-دە ەدى. جاس سارباز پريمورسك دەربەس ارمياسىنىڭ بارلاۋ پولكىنە جىبەرىلىپ, كەيىن III بەلارۋس مايدانى راديوتورابىنىڭ باستىعى بولىپ تاعايىندالعان.
ۆاسيلي شيپيلەۆ اسكەري قىزمەت جولىندا I دارەجەلى «وتان سوعىسى» وردەنىمەن, «جاۋىنگەرلىك ەرلىگى ءۇشىن», «كەنيگسبەرگتى العانى ءۇشىن», «گەرمانيانى جەڭگەنى ءۇشىن», باسقا دا مەدالدارمەن ماراپاتتالدى. سوعىستان كەيىن دە اسكەري قىزمەتىن جالعاستىرىپ, 1950 جىلى زاپاسقا شىققان.
ودان سوڭ بۇرعىلاۋ قوندىرعىسىندا جۇمىسشى, كەيىن شەبەر بولىپ جۇمىس ىستەگەن. ماكارون فابريكاسىندا بارلىق ماماندىقتى مەڭگەرىپ, VI دارەجەلى سلەسار اتاندى. وسى جەردە ول ايەلى ۆالەنتينانى كەزدەستىرىپ, وتاۋ قۇردى. ەكەۋى 62 جىل بىرگە ءومىر ءسۇرىپ, ريمما, ولگا جانە يرينا اتتى ءۇش قىزدى دۇنيەگە اكەلدى. ولاردان التى نەمەرە مەن شوبەرەلەرى بار.
