حالىقتىڭ قازىناسىن زاڭسىز پايدالانىپ كەلگەندەرگە توسقاۋىل قويۋدى مەملەكەت باسشىسى «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى قازاقستان حالقىنا جولداۋىندا دا قاداپ ايتىپ, جەرگىلىكتى جەرلەردەگى اتقامىنەرلەرگە شۇعىل تاپسىرما جۇكتەگەنى بەلگىلى. پرەزيدەنت تاپسىرماسى اياسىندا بارلىق ءوڭىر سەكىلدى جامبىل وبلىسىندا دا ناقتى جۇمىس قولعا الىندى. كەيىنگى بىرنەشە جىل بەدەرىندە جامبىل وڭىرىندە زاڭسىز يەلەنگەن جەرلەردى قايتارۋ بويىنشا اۋقىمدى جۇمىس اتقارىلىپ, مىڭداعان گەكتار القاپ مەملەكەت مەنشىگىنە بەرىلگەن ەدى.
پرەزيدەنت تاپسىرماسىن جۇزەگە اسىرۋ جۇمىسى جامبىل وڭىرىندە بىرنەشە جىل بۇرىن مىقتاپ قولعا الىنعانى ءمالىم. باياندى باستامانىڭ ەل دامۋىندا ايرىقشا ماڭىزعا يە ەكەنىن جەدەل تۇسىنگەن جەرگىلىكتى اتقارۋشى بيلىك وكىلدەرى اۋقىمدى جۇمىس اتقارعانىنا ەشكىمنىڭ تالاسى جوق. ناتيجەسىندە, تالاي مىقتىنىڭ ۋىسىندا كەتكەن ۇلان-عايىر القاپ ەل يگىلىگى ءۇشىن مەملەكەت مەنشىگىنە ءوتتى. جەرگىلىكتى حالىق اۋىل شارۋاشىلىعى ماقساتىنداعى جەرلەردىڭ يگىلىگىن كورەتىن كۇن دە جەتتى.
ناقتى دەرەككە جۇگىنسەك, 2021 جىلى مەملەكەت مۇددەسى ءۇشىن 106,3 مىڭ گەكتار القاپ كەرى قايتارىلسا, 2022 جىلى بۇل كورسەتكىش 201 مىڭ گەكتاردى قۇراعان. ال 2023 جىلى مەملەكەت مەنشىگىنە قايتارىلعان جەردىڭ ۇلەسى 201,2 مىڭ گەكتارعا جەتكەن ەدى. جامبىلدىق اتقامىنەرلەر 2024 جىلى 80 مىڭ گەكتار القاپتى ەل يگىلىگى ءۇشىن كەرى قايتارۋدى جوسپارلاعانى بەلگىلى. الايدا بۇل كورسەتكىشتى العاشقى 8 ايدىڭ قورىتىندىسىندا اسىرا ورىنداعان. ناقتىراق ايتساق, 87,5 مىڭ گەكتار جەر 8 ايدىڭ بەدەرىندە مەملەكەت مەنشىگىنە قايتارىلعان. وسىلايشا, وڭىردە بىرنەشە جىلدا كەرى قايتارىلعان جەردىڭ ۇلەسى جۇزدەگەن مىڭ گەكتارعا جەتكەن.
بىرنەشە جىل بەدەرىندە توقتاۋسىز جۇرگىزىلىپ كەلە جاتقان بۇل جۇمىس وبلىس اۋماعىندا وڭ ناتيجە بەرىپ وتىرعانى انىق. وتكەن جىلى ءوڭىر باسشىسىنىڭ ورىنباسارى ءابىلحايىر تامابەك ەل يگىلىگى ءۇشىن كەرى قايتارىلعان مىڭداعان گەكتار القاپتى ءوڭىر ەكونوميكاسىن دامىتۋ ماقساتىندا قايتا اينالىمعا ەنگىزۋ جۇمىسى جولعا قويىلعانىن تىلگە تيەك ەتتى.
«پرەزيدەنت تاپسىرماسى اياسىندا قولعا الىنعان باياندى باستاما ءوز ناتيجەسىن بەرىپ وتىر. 2021 جىلى – 60,2 مىڭ, 2022 جىلى – 46,9 مىڭ, 2023 جىلى – 66,1 مىڭ, 2024 جىلدىڭ 8 ايىنىڭ قورىتىندىسىنا سايكەس 46,9 مىڭ گەكتار جەر اۋىل شارۋاشىلىعى اينالىمىنا تارتىلدى», دەگەن ەدى ول.
وبلىس اكىمدىگى جەر قاتىناستارى باسقارماسىنىڭ باسشىسى دانيار وتەپوۆتىڭ ايتۋىنشا, يگەرۋسىز جاتقان جەرلەرگە قاتىستى شارا قولدانۋ جۇمىسى وسى جىلى دا قارقىندى جۇرگىزىلىپ جاتىر. اسىرەسە اۋداندار تاراپىنان مال باسى تىركەلمەگەن القاپتار تۇراقتى باقىلاۋعا الىنعان كورىنەدى.
«2025 جىلدىڭ ەكىنشى جارتىسىندا اتقارىلعان اۋقىمدى جۇمىس از ەمەس. اۋداندار تاراپىنان مال باسى تىركەلمەي يگەرۋسىز قالعان جەرلەرگە شارا قولدانۋ جۇمىسى قولعا الىندى. ناتيجەسىندە, جەر رەسۋرستارىن باسقارۋ دەپارتامەنتىنە 419,3 مىڭ گەكتار جەردىڭ قۇجاتى جولدانعان بولاتىن. بۇل جۇمىس ءوز ناتيجەسىن بەرگەنى انىق. وسى جىلدىڭ 11 ايىنداعى قورىتىندىسى بويىنشا 53 مىڭ گەكتار القاپ يگەرىلىپ جاتىر. سونىمەن قاتار 31,5 مىڭ گەكتار جەر يەلەرىنىڭ قايتىس بولعانى انىقتالىپ وتىر. بۇل جەرلەردى ازاماتتىق كودەكستىڭ 242-بابىنا سايكەس 1 جىل بەدەرىندە يەسىز م ۇلىك رەتىندە ەسەپكە الۋ جۇمىسى جۇرگىزىلىپ جاتىر. بۇدان بولەك, 128,7 مىڭ گەكتار القاپ بويىنشا اتقارىلعان جۇمىس دەپارتامەنتتىڭ وندىرىسىندە تۇر. ال 131,2 مىڭ گەكتار جەردىڭ يەلەرى اۋىسقانىن ايتا كەتكەن ءجون. بۇل جەرلەردى اۋداندار تاراپىنان جاڭا مەنشىك يەسىن انىقتاي وتىرىپ, قايتا ناقتىلاۋ جۇمىستارى جۇرگىزىلەدى», دەيدى باسقارما باسشىسى.
د.وتەپوۆتىڭ ايتۋىنشا, پايدالانۋسىز قالعان, زاڭنامانى بۇزۋ ارقىلى بەرىلگەن اۋىل شارۋاشىلىعى ماقساتىنداعى القاپتاردى مەملەكەت مەنشىگىنە قايتارۋ جۇمىسى وسى جىلى دا توقتاۋسىز جۇرگىزىلەدى. مەملەكەت باسشىسىنىڭ تاپسىرماسى نەگىزىندە قولعا العان اۋقىمدى جۇمىس اياسىندا 11 ايدا 61 مىڭ گەكتار القاپ مەملەكەت مەنشىگىنە قايتارىلىپتى.
«پرەزيدەنت تاپسىرماسىن جۇزەگە اسىرۋ ماقساتىندا قولعا العان جۇمىس ءتيىستى دەڭگەيدە ىسكە اسىرىلادى. قازىرگى ۋاقىتقا دەيىن جامبىل, جۋالى, قورداي, مويىنقۇم, سارىسۋ جانە شۋ اۋداندارىندا ءتيىستى كونكۋرس جۇرگىزىلدى. ناتيجەسىندە, 14,2 مىڭ گەكتار جەر اۋىل شارۋاشىلىعى اينالىمىنا قايتا ەنگىزىلدى», دەيدى د.وتەپوۆ.
اۋىلدىق جەرلەردە تۇراتىن حالىق ءۇشىن جايىلىم جەر قاي كەزدە دە باس اۋرۋعا اينالعانى ءمالىم. التىن بەسىككە قازىعىن قاققان حالىقتىڭ ماسەلەسىن شەشۋ ماقساتىندا دا وڭىردە ىلكىمدى جۇمىس اتقارىلىپ جاتىر.
«پرەزيدەنت تاپسىرماسىن جۇيەلى تۇردە جۇزەگە اسىرۋدىڭ قاي كەزدە دە ماڭىزى زور دەپ ويلايمىن. سوندىقتان دا ءبىز ءبىر قولدىڭ سالاسىنداي بىرىگىپ, زاڭسىز الىنعان, پايدالانىلماي جاتقان جەرلەردى مەملەكەت مەنشىگىنە قايتارۋ ماقساتىندا جىلدار بويى ۇزدىكسىز جۇمىس ىستەپ جاتىرمىز. بۇل جۇمىستىڭ الداعى ۋاقىتتا دا توقتامايتىنى انىق. ويتكەنى العا قويعان ايقىن ماقسات بار. ەڭ باستىسى, ءدال وسى جۇمىستى جۇيەلى تۇردە اتقارۋ ارقىلى ءوڭىر ەكونوميكاسىن وركەندەتۋگە سۇبەلى ۇلەس قوسساق دەيمىز. اۋىلدىق وكرۋگتەرگە قاراستى ەلدى مەكەندەردىڭ ورتاق پايدالانۋىنداعى جايىلىم جەرلەردى كەڭەيتۋ جۇمىسى جۇيەلى تۇردە جۇرگىزىلەدى. جالپى العاندا, بوس جاتقان 403,5 مىڭ گەكتار القاپ جايىلىم جەر رەتىندا تاڭدالىپ الىندى. ال جەرگىلىكتى ءماسليحاتتاردىڭ پارمەنىمەن 161,1 مىڭ گەكتار جەر رەسمي بەكىتىلدى. سونىمەن قاتار 242,4 مىڭ گەكتار جەردى جايىلىم القابى رەتىندە ورنالاستىرۋ جۇمىسى جوسپارعا ساي اتقارىلادى. جالپى العاندا اۋىل شارۋاشىلىعى مينيسترلىگىنىڭ تاپسىرماسىنا سايكەس قوسىلعان جەرلەر جەرگىلىكتى ءماسليحاتتاردىڭ شەشىمىمەن بەكىتىلۋى كەرەك. بۇل جۇمىس 2026 جىلدىڭ ماۋسىمىنا دەيىن تولىققاندى اياقتالادى دەگەن سەنىم زور. ءبىزدىڭ باسقارما تاراپىنان بۇل باعىتتاعى جۇمىس ءوز دەڭگەيىندە جۇزەگە اسىرىلىپ جاتقانىن ايتا كەتكەن ءجون», دەيدى جاۋاپتى باسقارما باسشىسى.
قالاي دەسەك تە, جامبىل وڭىرىندە كەيىنگى 3-4 جىلدىڭ بەدەرىندە سەڭ قوزعالعانىنا ەشكىمنىڭ تالاسى جوق. ەڭ باستىسى, قولىندا بيلىگى بار كەزدە ۇلان-عايىر القاپتى زاڭسىز يەلەنىپ العاندارمەن ىمىراسىز كۇرەس جۇرگىزىلىپ, 100 مىڭداعان گەكتار جەر مەملەكەت مۇددەسى ءۇشىن كەرى قايتارىلعانى كوڭىل قۋانتادى. بۇل جۇمىس الداعى ۋاقىتتا دا جالعاسىن تاباتىنى ءسوزسىز. ويتكەنى حالىقتىڭ قازىناسىنا تەلىنگەن قارا جەردىڭ قىزىعىن جەرگىلىكتى قاراپايىم تۇرعىندار كورۋى كەرەك.
جامبىل وبلىسى
