اۋقىمدى ءىس-شارا ناۋرىزدا اقتوبە قالاسىندا وتكەن جالپىحالىقتىق سەنبىلىكتەن باستالدى. بۇل كۇنى وبلىستىق جاستار رەسۋرستىق ورتالىعىنىڭ باستاماسىمەن ەكى مىڭعا جۋىق جاس كوشەلەر مەن ساياباقتاردا تازالىق جۇمىستارىن جۇرگىزدى.
جىل بويى تۇرعىندار الەۋمەتتىك جەلىلەر مەن رەسمي مەكەمەلەردىڭ ينتەرنەت پاراقشالارىندا جاريالانعان حابارلاندىرۋلار ارقىلى جوسپارلانعان تازالىق شارالارىنا جينالىپ وتىردى. جالپىحالىقتىق اكتسياعا وبلىستىڭ ون ەكى اۋدانى مەن وبلىس ورتالىعىنان 395 مىڭ تۇرعىن, 7 399 مەكەمە مەن كاسىپورىن قاتىستى. جۇدىرىقتاي جۇمىلعان شارۋانىڭ ارقاسىندا 97 925 اۋلا, 1 481 الەۋمەتتىك نىسان قوقىستان تازارتىلىپ, 289 ساياباق پەن گۇلزار رەتكە كەلتىرىلدى, 333 902 ءتۇپ اعاش, 6 415 بۇتا ەگىلدى. قاتتى تۇرمىستىق قالدىق پوليگونىنا 68 684 توننا قوقىس شىعارىلدى. توعايلار مەن قالا سىرتىنداعى دەمالىس ورىندارىن تازالاۋ شارالارىنا 5 786 تەحنيكا تارتىلدى. اعاش كوشەتتەرىن وتىرعىزۋ جۇمىسىنا وڭىردەگى توعىز ورمان شارۋاشىلىعى مەكەمەسىنىڭ ماماندارى جۇمىلدىرىلدى. ولارعا مەكتەپ وقۋشىلارى, كوللەدج, جوو ستۋدەنتتەرى كومەككە كەلدى.
تازالىق, كوگالداندىرۋ جۇمىستارى ءار اۋداننىڭ ەرەكشەلىگىنە ساي, ءتۇرلى باعىتتا ۇيىمداستىرىلدى. ماسەلەن, بايعانين اۋدانى قاراۋىلكەلدى اۋىلىنىڭ جانىنداعى بۇلاق كوزىن ارشۋ, ونىڭ اينالاسىن اباتتاندىرۋ ەرەكشە قۇرمەتتەلگەن باستاما رەتىندە باعالانادى. ايتا كەتەرلىك جايت, ء«مولدىر بۇلاقتى» تازالاۋعا بايعانيندىكتەر جىل سايىن ءساۋىر ايىندا ىقىلاسپەن كىرىسەدى. بۇل شارا ەرتەرەكتەگى اقساقالداردىڭ وزەن, كول, بۇلاق اينالاسىن تازا ۇستاپ, مالدىڭ بەي-بەرەكەتسىز سۋاتىنا اينالدىرمايتىن ونەگەسىن قايتا تىرىلتكەندەي بولدى.
وسىنداي جۇمىستار ويىل, ىرعىز, شالقار اۋداندارىندا دا جالعاسىن تاۋىپ كەلەدى. ءۇش اۋداننىڭ تۇرعىندارى ويىل, ىرعىز, شالقار وزەندەرىنىڭ جاعالاۋلارىن تازا ۇستاپ, تال-بۇتا ەگۋدى جاقسى داستۇرگە اينالدىردى. بالالار جازعى كانيكۋل كەزىندە كوكتەمدە وزدەرى وتىرعىزعان اعاشتاردى سۋارىپ, كۇتىپ-باپتاۋ ارقىلى ءبىر جاعىنان ەڭبەككە تاربيەلەنسە, ەكىنشى جاعىنان قورشاعان ورتاعا, جاسىل تابيعاتقا جاناشىرلىقپەن قاراۋ سەزىمدەرىن بويىنا سىڭىرە ءبىلدى. وسكەلەڭ ۇرپاق ەرەسەكتەردىڭ تازالىق اكتسياسىنا بەلسەنە قاتىسقان ءىس-ارەكەتتەرىنەن تاعىلىم الادى. كوزبەن كورگەندەرىن كوڭىلدەرىنە تۇيگەن بالالار تازالىق جەكە باسىڭدى كۇتىپ باپتاۋ ەمەس, قورشاعان ورتاعا جاناشىرلىقپەن قاراۋ ەكەنىن ۇعىنادى. تازالىق مادەنيەتى وسىدان باستاۋ الادى.
نازار اۋدارارلىق جايت, كەيىنگى ۋاقىتتا قالاداعى گۇلزارلار مەن ساياباقتاردا بەي-بەرەكەت قوقىس شاشىلىپ جاتپايتىن بولدى. سوعان قاراعاندا, جالپىحالىقتىق ءىس-شارا ناتيجەسىن بەردى. تازالىق ادامدى جيناقىلىققا, تارتىپكە ۇيرەتەدى. ءتارتىپ ىشكى مادەنيەتتى بيىكتەتەدى. زاڭدى سىيلاپ, كوپشىلىك ورىنداردا وزدەرىن دۇرىس ۇستاي بىلەتىن جاندار قاتارى كوبەيگەن سايىن قوعام دا جاقسى باعىتقا قاراي وزگەرەدى. وسى ورايدا, ءتارتىپتى ەل, مادەنيەتتى ۇلت يدەياسى شەڭبەرىندە باستاۋ العان «تازا قازاقستان» اكتسياسى قوعامدىق سانانى ساۋلەلەندىرۋگە جاقسى باستاما بولعانى انىق.
اقتوبە وبلىسى
