فوتو: اشىق دەرەككوز
ۇكىمەت بريفينگىندە سەرىك جۇمانعارين ءوزىن «سالىق رەفورماسىنىڭ اكەسى» دەپ اتايتىندارعا جاۋاپ بەرىپ, بۇل باعىتتاعى جۇمىستىڭ اشىقتىعىنا توقتالدى. ونىڭ ايتۋىنشا, رەفورما كەزدەيسوق بولجامدارعا ەمەس, حالىقارالىق تاجىريبە مەن ۇزدىك مامانداردىڭ ساراپتاماسىنا سۇيەنىپ جاسالعان.
«مۇنداي ماڭىزدى سالادا ەكسپەريمەنت جاساۋعا ەشكىمنىڭ قۇقىعى جوق. بۇل − كوفەمەن ساۋەگەيلىك جاساۋ ەمەس. ءبىز ءبىر جىل بويى بيزنەسپەن جانە قوعاممەن اشىق تالقىلادىق. مەن بۇل رەفورمانىڭ ۇيلەستىرىلۋى مەن ناتيجەسى ءۇشىن جاۋاپتىمىن», دەپ مالىمدەدى ۆيتسە-پرەمەر.
مينيستر سالىق مولشەرلەمەلەرىن, سونىڭ ىشىندە ققس پەن كورپوراتيۆتىك سالىقتى قايتا قاراۋ − ەكونوميكالىق تۇراقتىلىقتى ساقتاۋ ءۇشىن الەمدىك تاجىريبەدە ءجيى قولدانىلاتىن شارا ەكەنىن اتاپ ءوتتى.
س. جۇمانعاريننىڭ پايىمداۋىنشا, باسقا ەلدەرمەن سالىستىرعاندا قازاقستان رەفورمانى اسىعىس ەمەس, جان-جاقتى تالقىلاۋ ارقىلى جۇزەگە اسىرىپ جاتىر.
بۇعان دەيىن ۇكىمەت باسشىسى جاڭا بيۋدجەت كودەكسىنە سايكەس شاعىن بيزنەستەن تۇسەتىن بارلىق سالىق ءتۇسىمى اكىمدىكتەردىڭ يەلىگىندە قالاتىنىن اتاپ ءوتتى.
